Nuummiit Aasiannut ipunniartut

Aasianninngaanniit Nuuk tikillugu umiaaqqamik ipunniat piareersarnertik naammassileruttorpaat. Unnugu arfineq-pingasunut ipullutik aallassapput, anguniagarlu siulleq tassaavoq Manermiumik taaneqartartoq.

Peqataasussat ilaat Anna Nuka Olsen Rosing ima oqarpoq:

- Unnugu aallarutta tinimukaarnera malillugu aallassaagut, tikitassarpullu siulleq tassaavoq Manermiut. Tassani unnueriariarluta aqagu Kangaatsialiarluta aallassaagut, neriuutigaarpullu aqagu unnukkut Knagaatsiamut tikissinnaassalluta, Anna Nuka oqaluttuarpoq.

Anna Nuka Olsen Rosing 37-nik ukioqarpoq, Nuumminngaanneerlunilu.

Ipunnissaq aappaagumut piareersaatitut naatsorsuussaavoq.

Nunarput Motoorilinnik Atortoqarani-mik taallugu ipunneq 2004-mi nappaammik eqqorneqarneq pissutigalugu unitsiinnarneqartariaqarsimavoq.

Naammassineqarnissaali siunertaralugu inuit sisamat piareersarput. Peqataasussat ilaat, Atammimmiup 26-nik ukiullip Iiffa Poulsenip, ipunnissarsuarmut peqataasussanngornini ima oqaluttuaraa:

- Atammimmiitsillunga Anna Nukamit sianerfigiteriasaarpunga. Taanna nalunngisarigakku. Sisamanngornikkut sianerpoq, tallimanngornermilu Nuummut aallarlunga. Tassa piareersimanngiivillunga akuersivunga, misigisassarli uannut nutaajugami akuersivunga, pissanganaqaaq, Iiffa Poulsen oqarpoq.

Peqatasussat tamarmik pissangapput, soorluttaaq Anna Nuka Olsen Rosing pissangaqisoq:

- Soorunami pissangavugut qilanaarlutalu. Aallarnissatsinnut pilereqaagut, tamattalu peqqeqaluta, Anna Nuka Olsen Rosing oqarpoq. Anna Nukap Iiffallu saniatigut peqataasussat tassaapput 45-nik ukiulik Flavia Lyberth, Nuumminngaaneersoq. Ilisimaneqarluartoq Peter Brandt, 64-inik ukiulik, mannalu Aasianni najugaqartoq, angalanermilu taanna aquttuussaaq. Angalaneq sapaatit akunneri tallimat missaannik sivisussuseqassangatineqarpoq.