Nuummiit aallartoqarnissaanut qasukkaaneq: Maanna Københavnimukartoqarsinnaalerpoq
Tunillaassortunik nappaalanersuaqarneranut ataatsimiititaliarsuup illoqarfiit pingaarnersaanni kingullermik tuniluuttoqalernera pissutigalugu Nuummi angallanneq tamarmi ippassaq unitsippaa. Nuummiit nunatsinni najugaqarfiusunut allanut angalanissat tamarmik erngertumik inerteqqutigineqalerput. Tamanna 2021-mi juunip ulluisa 22-annut atuuttussaavoq.
Ataatsimiitaliarsuulli peqqussut taanna maanna qasukkaaffigaa, taamaalillutik Nuummiit Københavnimut angalasussat killilersuinernut ilaatinneqarunnaarlutik.
Politiit Tunillaassortunik nappaalanersuaqarneranut ataatsimiititaliarsuaq sinnerlugu tusagassiuutinut taama nalunaaruteqarput.
AAMMA ATUARUK Naalakkersuisoq: Taamaammat killilersuisoqarnerunngilaq
Mittarfeqarfiit, Air Greenlandip nakorsaaneqarfiullu Nuummiit Købehavnimut timmisartukkut angalasoqarnerani Kangerlussuarmut aqqusaartut tunillaasoqaratarsinnaanerata sapinngisamik qanoq annikillisarneqarnissaanut maleruaqqusat assigiinngitsut isumaqatigiissutigaat.
AAMMA ATUARUK Nuuk sapaatip akunnerani mattunneqartoq
Tamanna tunngavigalugu Nuummiit Københavnimut Kangerlussuaq aqqusaarlugu angalasussat
Tunillaassortunik nappaalanersuaqarneranut ataatsimiititaliarsuup Nuummiit angalasoqaqqusinnginneranut ilaatinneqarunnaarput.
Mittarfiit eqqaani immikkut mattusimatitsineq sivitsorneqartoq
Tunillaassortunik nappaalanersuaqarneranut ataatsimiititaliarsuup illoqarfimmit aallartoqarsinnaajunnaartitsinermi saniatigut mittarfimmi sanaartorfiup eqqaani covid-19-imik suli tunillaassuuttoqartutut oqartussat naliliinerat pissutigalugu immikkut mattusimatitsineq aamma sivitsorneqarpaa.
Immikkut mattusimatitsisoqarneratigut sanaartorneq tamarmi mattusimatinneqarpoq. Mittarfimmi sanaartornermik suliaqartut nioqqutissanik pisariaqartitaminnik pajunneqartassapput. Inuit nioqqutissanik pajuttut qanermut kiinnamulluunniit assiaquteqarnissaat piumasaqaataavoq, taakkulu allanut 2 meterinit ungasitsigisassallutik.
Tamatuma saniatigut immikkut mattusimatitsivimmiittut suli ikiorneqarsinnaallutillu coronamut misissortissinnaapput.