Canadamiut sakkutuui imarsiortut ukiuni kingullerni 50-ini issittup imartaaniissimanngeriarlutik, issittup imartaani qaammat ataaseq angalaqqammerput.
Umiarsuit marluk angalaarnerminni tikitassaat kingulleq tassaavoq Nuuk, angalaqataasullu ilaat naapippavut:
- Angalanitsinni aatsaat taama avannarpasitsigisumiilerpugut, ilami Canadamiut umiarsuaataat ukiuni kingullerni 50-it ingerlanerini aatsaat taama avannarpartersimatigaaq, løjtnanti Robert Tucker oqarpoq, nangillunilu:
- Sakkutuut timmisartortartut sakkutuullu sungiusaqatigiipput. Umiarsuarmi ilaasut amerlanersaasa qaasuitsup killeqarfia aatsaat tikippaat, taamaammallu tamatsinnut puigunaatsorujussuuvoq, Robert Tucker nassuiaavoq.
Umiarsuarmi sakkutuuinnaq Michael Plax oqarpoq pissusitoqqat malilluinnarlugit iliortoqarsimasoq, Robert Tuckerilu sakkutuut naalagaanni inuusunnersaammat pissusitoqqat malillugit sulisinneqarsimalluni:
- Ilupaqutaannaalluni umiarsuup saneraata ilamernga qalipattariaqarsimavaa. Aalisagaq apartariaqarsimavarput, issittullu imartaanut misunneqarluta salinneqarluta, Michael Plax nassuiaavoq.
Maanna Nuummiipput, tamaaniinnertillu nuannaraat, Robert Tucker oqarpoq:
- Nuuk nuanneqaaq, inuit inussiarnersorujussuupput, illoqarfillu nuanneqaaq. Periarfissaqalissagaluaruma maanga tikeraaqqikkumaarpunga, tamanna qularutiginngilluinnarpara, Robert Tucker oqarpoq.
Taamatullu periarfissaqassagunartoq, sakkutuuinnaq Whitney Manuel oqarpoq:
- Umiarsuaatitta avannarpasissumut angalasarnerat akulikinnerulissaaq. Immaqa ukiut tamaasa, ukiulluunniit allortarlugit. Umiarsuit tikeqqinissaat ilimagilluinnarpara, Whitney Manuel oqarpoq.
Canadap issittortaanik piginnittussaanerup, Canadap ministeriunerata Stephen Harperip pingaarteqisaata, saniatigut, issittuliartarnissamut pissutissaqarluartut, Michael Plax oqarpoq, assersuutaalu tassaavoq Nuummi imerniartarfiit ilaat:
- Imerniartarfik innga – issiaatalik – nuanneqaaq, imigassaatai mamaqaat, inuillu nuanneqalutik, Michael Plax naggasiivoq.
