Nuummi uumasuutinut iliveqarfik inerteqqut
"Mozart Olsen Heinrich", ujarattat ilaanni timmisartoqarfiup aqqutaaniittumi allassivoq. Taanna allallu uumasuutit ilerri imminnut ungasigatik inissisimapput.
Kisianni nunaminertamik atuinissamik qinnuteqartoqarsimannginnera pillugu ilerrit Kommuneqarfik Sermersuumit piiarneqariaannaapput.
- Aap, piiarneqariaannaapput. Saaffiginnittoqariarmat siorna maleruaqqusat misissorlugit aallartippavut. Paasivarput uumasuutinik illoqannginnersamut ilisineq malittarisassanik unioqqutitsinerusoq, nunaminertamik atuisinnaanermut qinnuteqaqqaartoqartussaammat. Nunatsinni Nakorsaqarfik aamma Uumasut nakorsaqarfiata taamani oqaatigaa, uumasut timaat toqungasut ilineqassatillugit nunamut minnerpaamik 1,3 meeterimik ititigisumut assaanneqassasoq. Iliveqarfiliamili taama pisoqarsimanngilaq, Pinngortitamut Piujuartitsinermullu immikkoortortami pisortaq Roar Olsen, Nuuk TV-mut oqarpoq.
Taamaammat peerneqartariaqarsinnaapput.
Nuummi uumasuutillit piffissami sivitsulersumi uumasunut iliveqarfeqalernissaanik kissaateqarsimapput. Nuummi peqatigiiffimmi Uumasut Ikinngutaanni siulittaasoq Susanne Markdal ima nassuiaavoq:
- Aallartisaataasumik kommunimik siorna ataatsimeeqateqarpugut. Taakkuli oqarput uumasunut iliveqarfeqartitsinissaq namminneq isumagisassarinagu. Nunaminertamillu iliveqarfinngortitsinissaq 8-900.000 koruunit angullugit akeqarsinnaammat uagut akissaqartinngilarput, Susanne Markdal oqarpoq.
Kommuni iliveqarfiliassamut akuersissappat pilersinneqassappallu, peqatigiiffik ulluinnarni isumaginnittuusinnaalluni oqarpoq.
Nuummi uumasuutinut iliveqarfiliortoqassappat Kommuneqarfik Sermersuumi kommunalbestyrelse akuerseqqaartariaqassaaq.