Nuummi utertoorutissat 30 mio. koruunit missaanniipput

Aqagu inuit ilaat nuannaarlutillu pakatsissapput, tassami aqagu akileraarutinik utertoorfiunngikkuni akiligassaqalerfiussaaq.

Nuup kommuneani utertoorutissat 30 mio. koruunit missaat inunnut agguaanneqaleruttortut Nuup kommuneani akileraaruseriffimmi pisortaasup Franklin Høegh Olsenip oqaatigaa.

- Maani Nuup akileraaruseriffianinngaanniit inuit 4.194-t allagarsisittussaavagut aqagu 31-iani tigusussaassavaat. Taakkulu pissarsisussaassapput 30 mio. koruunit sinnerlugit. Kisianni incasso akiliisitsiniartarfik aqqutigeqqaarnikuugamikku taakanngaanniillu ilanngarneqarnikuupput. Naatsorsuutigivarput 23 mio. koruunit sinnilaarlugit nassiussimassallugit, Franklin Høegh Olsen oqarpoq.

Taanna aperaarput sooq utertoortoqartariaqalertarnersoq.

- Assigiinngitsunik pissuteqartarpoq ilaatigut ukioq naallugu sulisimanngikkaanni napparsimanikkut imaluunniit allatigut suliffissaarunneq pissutigalugu skattekortilu allanngortissimanngikkaanni sulileqqikkaannilu tamakku kinguneqarajuttarput utertoorutissaqalernermik, oqarpoq.

Aperaarput ulluni makkunani inuit ilaat nuannaartut ilaallu pakatsisut qanoq sulinerminni maluginiartarneraat.

- Imatorsuaq maluginiarneq ajorpavut, kisianni ilaat isertarput aperiartorlutik sooq taamarsuaq akiligassinneqarsimanerlutik kisianni iluamik nassuiaanneqaraangamik akiligassinneqaraluarlutilluunniit nuannaarlutik anisarput, taama oqarpoq Nuummi akileraartarfimmi pisortaq Franklin Høegh Olsen.