Nuummi Usisaat ikuallattoq

Nuummi suliffeqarfiit ilaat Usisaat Nuussuup ilaani sissiukkami ullumi ikuallappoq.

Nuummilu politiit ikuallannerup sumik aallartissimanera misissoraat, politiit tusagassiutinut nalunaarutaanni allassimavoq.

KNR pisoqarfimmukarpoq nalunaaqutaq ataatsip missaani suli ikuallanneq pujorpoq poltiit qatserisartullu ikuallattumik ulapputeqarput.

Kalaallit Nunaanni politiit aqutsisuat Carl Sværd ikuallannerup sumik aallartissimanera pillugu itinerusumik nassuiaasinnaanngilaq.

- Maannakkut oqaatigisinnaanngilara ikuallanneq suminngaanniit aallartissimanersoq, lagerersuaq ikuallalersimagaluarpoq ikuallannerli qangalili aallartippoq, massakkorpiaq ikuallannerup qanoq aallartissimanera paasiniarparput, Carl Sværd oqarpoq.

Taannalu erseqqissaavoq ajoqusertoqarsimanngitsoq.

- Tamarmik anereerput ajoqusertoqanngilaq, oqarpoq.

- Soorlu takusinnaagissi qatserisartut maanna qimagussorusaarput, uagullu aamma manna tikillugu paasisagut killeqarput, Carl Sværd oqarpoq.

Kalaallit Nunaata politiivisa aamma tusagassiutinut nalunaarlutik erseqqissaatigaat ikuallanneq maanna qaminneqareersoq.

Qatserisartulli suli pisoqarfimmiikkallarput ikuallannerup ikummaqqissinnaanera nakkutigalugu.

Taakku ilimagaat kallerup inneranik ikuallalerneq aallaaveqarsimagunartoq. Ikumanikorli nilloreerpat aatsaat erseqqinnerusumik paasisaqassallutik taakku oqarput.