Nuummi Upernavimmi eqqaanilu killilersuutit nutaat

Naalakkersuisut coronamut killilersuutinik nutaanik sapaammi nalunaaqutaq arfineq pingasuniit atuutilersitsiniarput.
Nuummi Upernavimmi eqqaanilu coronamut killilersuutit nutaat atuutilissaput. Assi © : Naalakkersuisut
novembarip 20-at 2021 19:00

Akiuussuserneqarsimanngitsut neriniartarfinnut, atuakkanik atorniartarfinnut, isiginnaariartarfinnut timersortarfinnullu iseqqusaanngillat.

Meeqqanut coronavirusereersimanngitsunut aamma atuupput.

Killilersuutit nutaat Nuummi Upernavimmilu sapaammi ullaakkut nalunaaqutaq arfineq pingasuniit atuutileriissapput decembarip ulluisa tallimaata tungaanut.

Naalakkersuisut tusagassiuutinut nalunaarummi allapput.

Nuummi inuit amerlanerpaamik 20-t taamaallaat isersimasinnaanerat atorunnaassaaq, kisianni ukunaniinniaraanni tamakkiisumik akiuussuserneqarsimanissaq piumasaqaataassaaq:

  • Neriniartarfinni, cafeni, imerniartarfinni, qitigiartarfinni.
  • Atuakkanik atorniartarfinni, kulturip illuanni, filmertarfinni, katersugaasivinni saqqummersitsisarfinnilu.
  • Katersortarfinni allanillu innuttaasut ataatsimoortarfianni.
  • Illup iluani silamilu eqaarsaartarfinni, soorlu timersortarfiit, naluttarfiit, timigissartarfiit arsaatarfiillu.
  • Nujaleriffiit, tagiartortittarfiit, allallu assigisaat.
  • Pisinarfiit Ulluinnarni pisariaqartitanut pisiniarfiunngitsut.

Taakku tamarmik inunnut marluleereersimasunut atuuttut, Naalakkersuisut allapput.

Inuit aqqaneq marluleereersimasut akiuussuserneqarsimanngitsut, misissortissimanermut negativiugaluarpataluunniit ukununnga iseqqusaanngillat:

  • Ulluinnarni pisariaqartitanut pisiniarfinni 
  • Allakkerivinni
  • Mittarfinni
  • Pisortani kiffartuussinermi init (assersuutigalugu kommunimi) aamma nukissiorfiit.
  • Pisortat assartuinermut atatillugu utaqqisarfiini assartuissutaannilu.

Taakku saniatigut Nuummiit Upernavimmiillu aallarniaraanni tamakkiisumik akiuussusersimanissaq piumasaqaataalerpoq. Misissortissimanermut negativiunissaq naammanngilaq, akiuussusersimanissaq piumasaqaataavoq.

Inunnullu tamanut atuutinngitsut, Naalakkersuisut allapput. Tassa innuttaasut najukkaminnut angerlartussat aallarsinnaatitaapput.

Pisortat kiffartuussiviannut iserniaraanni qanermut assiaqut atorneqassaaq.

Killilersuutit nutaat tamakkiisut Naalakkersuisut nittartagaanni uani atuarsinnaavatit