Nuummi Unnuarissat aallarteqqilerput

Unnuarissat sungaartortalinnik atisallit Nuummi meeqqanik inuusuttuaqqanillu unnuakkut aneertunik sissueqqittalissapput.
januaarip 12-at 2009 13:08

Nuummi meeqqat pillugit peqatigiiffik Nanu nammineq piumassutsiminnik unnuarsioqataasarsinnaasunik pissarsiorlutillu pikkorissartitsisalerput. Peqatigiiffiup siulittaasua, Krissie Wiinberg aperivarput unnuarissat sulerisassanersut. Inersimasut meeqqat inuusuttuaqqallu ajornartorsiutaannik allanilluunniit eqqartorumasaannik tusarnaarnissaminnut oqaloqatiginninnissaminullu piffissaqarlutik misiginneqataasinnaasut pisariaqartippagut. Unnuarissallu aqqusinermi ersarinnermikkut meeqqanik inuusuttuaqqanillu toqqissisimalersitsisinnaassapput, akisussaassuseqartumillu pissusilersornermikkut aamma pinerlunnissaraluit, aserorterinissaraluit persuttaanissaraluillu pinngitsoortinniarsinnaassallugit. Unnuarissat soorunami politiit suliassaannut akuliuttussaanngillat, meeqqanilli inuusuttuaqqanillu pisariaqartitsisunik toqqissisimalersitsisussaallutik, meeqqanut peqatigiiffimmi Nanu-mi siulittaasoq Krissie Wiinberg oqarpoq. Naluara qanoq suliassarput pisariaqartiginersoq, nalunngilarali siornatigut Nuummi unnuarissanik angalaartoqartarnikuusoq, taamanilu suleqataasimasut misilittaagaat maanna katersorpagut. Kialluunniilli takusinnaavai meeqqat inuusuttuaqqallu unnuaannakkut aneertartut. Danmarkimi Unnuarissat allaffeqarfianni pisortaq, Erik Thorsted atassuteqarfigigatsinni ikiuukkumaqaaq, siunnersuisussanillu marlunnik Nuummukartitsisinnaammat arfininngornermi februaarip ulluisa arfineq aappaanni suleqataarusuttunik pikkorissartitsissaagut. Taamanikkussamut suleqataarusuttut aggialluarumaartut neriuutigaarput. Ullunilu taakkunani aamma aqqusinermi qanoq periuseqarsinnaanerput aamma misilissavarput, atortussavullu, soorlu kavaajat sungaartut aamma misilissallugtigit, Krissie Wiinberg oqarpoq. Krissie Wiinbergip oqarneratuut Nuummi Unnuarissat siornatigut ingerlanneqarnikuugaluarput, sulisussaaleqinerli pissutigalugu unitsinneqarallarsimalluni. Unnuarissani siornatigut siulittaasuusimasoq, Henrik Sørensen oqarpoq suleqataarusuttut qanoq amerlatiginerat naapertorlugu anguniakkat killilerneqartariaqartut. Soorlu suleqataarusuttut ikippallaarpata sapaatip akunnerisa naaneri tamaasa unnuarissanik aneertoqartittarnagu.

Unnuarissanut suleqataarusuttut nittartagaq; nanuboern.gl atorlugu saaffiginnissinnaapput.