Politiit ullormut nalunaarutaat: Nuummi unnuaanerani tillinniaqattaartut

Nuummi unnuaanerani pingasoriarluni tillinniartoqarpoq. Tillinniarfigitittut pingasut tamakkerlugit politiinit misissorneqaleruttorput, tillinniarnerit imminnut attuumassuteqarsinnaanerittaaq misissorpaat.

Allattoq Nicole Sander Bertelsen

apriilip 16-at 2025 09:21

Nutserisoq Karla Heilmann

Katersugaasivik Nuutoqaq, atuareernerup kingorna ornittagaq namminerisamillu angerlarsimaffik unnuaq tillinniarfigitissimasut, Kalaallit Nunaata politiivisa pigaartuisa pisortaat Aputsiaq Hansen oqarpoq.

- Tillinniartoqarsimaneranik pingasoriarluta nalunaarfigineqarpugut, tillinniarfigitittullu tamakkerlugit misissuiffigileruttorpavut. Misissuinerli aatsaat aallartippoq, Aputsiaq Hansen oqarpoq.

Taamaattumik tillinniarnerit taakkua pingasut imminnut attuumassuteqarnersut, politiiniittaaq oqaatigissallugu siusippallaarpoq.

Biili aallarunneqartoq

Katersugaasivik Nuutoqqamut tillinniarneq nalunaaqutaq tallimat qaangilaannguaraa Kalaallit Nunaata politiivinut nalunaarutigineqarpoq. Atuareernerup kingorna ornittakkamut arfininnguliivissoq nalunaarutigineqarpoq, namminerisamullu angerlarsimaffimmut tillinniarneq ullaaq manna nalunaarutigineqarluni.

Aamma atuaruk Politiit ullormut nalunaarutaat: Angutit pingasut qalipaasutut atallaalerlutik neriniartarfimmut tillinniartut

Pinerluttut namminerisamut angerlarsimaffimmut tillinniarnerminni biiili matuersaataat tillippaat kingornalu biili aallarullugu, pigaartut pisortaat oqarpoq.

- Nalunaaqutaq 07:20 nalunaarut tiguarput, tillinniarfigitittummi sinimmata, unnuaanerani pisimanissaa ilimagaarput.

Imigassaq initusimaqisoq

Tillinniarnerit saniatigut, aqqusinermi angerlarsimaffinnilu eqqissiviilliornerittaaq politiit ulapputigisimagaat, pigaartut pisortaat oqarpoq.

Aqqusinermi angerlarsimaffinnilu eqqissiviilliornerit imigassartorsimanermut attuumassuteqartut, pigaartut pisortaat oqarpoq.

- Sineriak tamakkerlugu aqqusinermi eqqissiviilliornerpaaluupput, amerlanerpaartaalli Nuummi pipput, Aputsiaq Hansen oqarpoq.

Katersugaasivik Nuutoqaq, atuareernerup kingorna ornittagaq tillinniarfigineqarput aamma namminerisamik angerlarsimaffimmi biilit matuersaataanik biilinillu tilliffiuvoq.

Sineriak tamakkerlugu imigassartorsimalluni aqqusinermi eqqissiviilliortitsinerit amerlanerilli Nuummi pisut.

Angerlarsimaffimmi eqqissiviilliortitsinerit nalunaaquttap akunnerini kingullerni 24-ni imigassartorsimanermittaaq pipput, pigaartut pisortaat Aputsiaq Hansen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.