Nuummi umiarsualiviup assersorneqarnera pillugu Politiit misissuipput

Aalisartut umiarsualivimmik assersuinerannut tunngasunik, Nuummi politiit misissuileruttorput. - Umiarsualivimmik assersuineq sapaatiummat ualikkut sisamanut taamaatinneqaraluartoq, taamaattoq isiginngitsuusaarsinnaanngilarput, tassami pinerluttulerinermik inatsit unioqqutinneqarpoq, Politimesteriugallartoq Bjørn Bay oqarpoq.
Allattoq Oline I. Olsen
juulip 06-at 2009 09:37

Nuummi politiit umiarsualivimmik assersuinermut tunngatillugu paasissutissanik katersillutik ulluni kingullerni ulapipput, soorlu kikkut kiisalu angallatit qassit assersuinermi peqataanersut paasiniarneqarput, assersuinerullu kingunerisaanik aningaasanik annaasaqartoqarnersoq aamma paasiniarneqarluni.

- Assersuinerup kingunerisaanik inuiaqatigiit annaasaqarnersut paasinialeruttorparput, soorlu attartortillutik angallassisartut, umiarsuit imaluunniit allat assersuisoqarneratigut annaasaqartut maanna naatsorsueqqissaassapput, Bjørn Bay oqarpoq.

Assersuinermi peqataasut ilaat eqqartuussivilersuunneqassapput, politiilli takussutissanik naammattunik pigisaqartillugit peqataasut ilaat eqqartuussivilersuunnagit akiligassinnissaannut periarfissaqassaaq. Eqqartuussivimmulli suliassanngortitsoqarnissaa qaqugu pissanersoq suli ilisimaneqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq