Nuummi umiarsualiviup allilerneqarnissaanut siullermeerluni qaartitsisoqartoq

Nuup umiarsualiviata allilerneqarnissaanut marlunngornermi siullermeerluni qaartitsisoqarpoq.

Periarfissaqarnerulernitsinnilu umiarsualiviup pisariaqartitatta piginissaa pisariaqartoq, Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq Iddimanngiiu Jensen Bianco umiarsualivittaassaami nivariarneq siulleq peqqammersoq oqarpoq.

- Nunarput ineriartorpoq. Nuuk alliartorpoq. Periarfissaqarneruleriartornitsinnilu talittarfiup pisariaqartitatta piginissaa pisariaqarpoq. Taamaammat allilernissaanut ullumikkut nivanneq siulleq nivassinnaagakku  nuannaarpunga, taanna oqarpoq.

Umiarsualivik Namminersorlutik Oqartussat pigisaata Sikuki Nuuk Harbourip pigisaraa.

Pisariaqartinneqarluartoq

Nuummilu umiarsualiviup allilerneqarneratigut aalisarnermut, takornariartitsinermut, umiarsualivimmilu atuisunut allanut ineriartortitsinerup ingerlatiinnarnissaa qulakkeerneqassasoq, Sikuki Nuuk Harbour tusagassiuutinut nalunaarummi allappoq.

Ineriartortitsinerullu ingerlatiinnarnissaanut qulakkeerneqarnissaa naalakkersuisumit isumaqataaffigineqarpoq.

- Massakkut takuneqarsinnaavoq qanoq annertunerutigisoq atorfissaqartikkipput taamaammat ineriartorneq tulluartutut uanga isigivara, Iddimanngiiu Jensen Bianco oqarpoq.

Qeqertaq Avallermi umiarsualivik 350 meterinik ilaneqassaaq. 200 meterit kilisaatinut atugassiaassapput, 150 meterillu illersornissaqarfiup umiarsuaataanut pingaarnermik atugassiaassallutik.

Nuummi umiarsualiviup allilerneqarnera 2028-mi novembarimi piareernissaa naatsorsuutigineqarpoq.