Nuummi umiarsualivimmik mattussineq unioqqutsitsineruvoq

Nuummi aalisartut umiarsualivimmik aqagu mattussiniarnerat pinerluttulerinermi inatsisip § 40-annik unioqqutitsinerussasoq politimesteriugallartup Bjørn Bayip oqaatigaa.
Allattoq Elisa Isaksen
juulip 02-at 2009 17:04

- Tamanna angallannermi angallatinik ajoqusersuineruvoq, matumani ilaatigut umiarsualivik pineqarluni, Bjørn Bay oqarpoq, matumanilu innersuussutigalugu Nunatta Eqqartuussiviata aamma Nuummi Eqqartuussiviup 2001-imi politiit umiarsualivimmik mattussinerup inatsisinik unioqqutitsinerunerarlugu naliliinerat isumaqatigimmassuk.

2001-imi umiarsualivimmik assersuisoqarmat aalisartut 10.000 koruunit angullugit akiligassinneqarput. Taamaattorli taamanerniit akiligassiisarnerit sukateriffigineqarnikuummata, umiarsualivinnik aqagumiit assersuiniartut 2001-imi akiligassiissutigineqartunit amerlanerussapput.

- Kingullermik assersuisoqarmat assersueqataasut tamarmik akiligassinneqarput, matumani assersuinermik aaqqissuisut kattuffiunerat inuinnartulluunniit peqataanerat apeqqutaatinnagu, massakkullu assersuiniartut aamma taama pineqassapput, politimesteriugallartoq Bjørn Bay oqarpoq. Taassuma oqaatigaa Nuummi aalisartut ilaannik, aqagu ulloqeqqaniit umiarsualivimmik assersuiniartunik politiit ataatsimeeqateqarsimasut.

- Aalisartut assersuinerminni annaassiniartoqartariaqalersillugu akornusersuiumanatik neriorsuereerput, Bjørn Bay oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq