Nuummi ullormi akiuussusersuinermut paatsuunganeq nutaaq
Ullumi sisamanngornermi juulip 29-ianni kikkunnut tamanut ammasumik akiuussutissamik kapuisoqassasoq, Nakorsaaneqarfiup nittartagaani nun.gl-imi sapaatip akunnerini arlalinni atuarneqarsinnaavoq
Tamanna aamma Nuuk Ugeaviisimi ussassaarutigineqarpoq, ilaatigut akeqanngitsumik filmeriarsinnaanermik eqquisoqarsinnaalluni.
Kommuneqarfik Sermersuup kikkut tamarmik ornigullutik aappassaanik kapitissinnaasut pingasunngorneq juulip ulluisa 28-ianni unnoreersoq facebookkikkut allappaa.
Taamaakkaluartorli ajutoortoqarpoq.
Innuttaasut ilaat akiuussuserneqarnissamut ullumi itigartinneqarput.
Peqqinnisaqarfiup oqarnera naapertorlugu innuttaasut juunip ulluis 29-anni siusinnerusumiluunniit kapitereersimasut kisimik kapitissinnaapput.
Tamanna Dronning Ingridiup Napparsimmaviata Facebookikkut ippassaq saqqummiuppaa, tamannali akiuussusersuinissamut nalunaarutinut allanut tamanut akerliuvoq.
AAMMA ATUARUK Nuummi sisamanngorpat nalunaaqutaq quliniit tallimanut akiuussusersuisoqaqqissasoq
Corona pillugu allattoqarfiup paasissutissiinermut suliaqartuata Rasmus Christensenip tamanna sulisut akornanni paatsooqatigiittoqarsimaneranik patsiseqarnerarpaa.
- Taama paatsiveerusimaartoqalerpoq kommunimi napparsimmaveqarfimmilu corona pillugu suliallit suleriusaat assigiinngimmata, tassami aatsaat suleqatigiinniarsarineq pilerpoq, ajoraluartumillu akunnitsinni paatsuuisoqarsimavoq, taanna KNR-imut oqarpoq, nangillunilu:
- Inuit ilaasa itigartinneqarsimanerat paatsoortoqarsimaneralu tamatta ajuusaarutigingaarparput.
Taassumalu ullup sinnerani takkuttut itigartinneqarnavianngitsut paasissutissiissutigaa.
Tamatuma saniatigut aqagu tallimanngornermi akiuussusersuisoqaqqinnissaa sulissutigineqarpoq.
Inuit juunip ulluisa 29-ata kingorna siullermeertumik kapitissimasut aqagumut marlunngorpamulluunniit aappassaanik kapitikkiartornissaat suli kaammatuutigineqarpoq.
