Nuummi ujajaalluni saassussisoqartoq
Nuummi Politiit illoqarfiup qeqqani angut kussinermi nalasoq nal.04.18 naammattoorpaat. Angut politiinut nassuiaavoq niviarsiaqqat pingasut angullu saassussimagaanni ujajaaffigalunilu. Angut kussinermiittoq kiinnamigut ajoqqusersimavoq.
-Ujajaaffigineqarnerani canadamiut ooriutai, tupat, angullu pigisai allat tiguneqarput, taama Nuuk Politi ilisimatitsivoq.
Inuit sisamat angummut ujajaasimasutut pasisat politiiniit nal.04.35 nassaarineqarput.
-Politiiniit tigusarineqarput, inuillu sisamat taakkua misissuiffigineqarnerini angutip ujajaaffigineqartup ooriutai pigisaalu nassaarineqarput, taama Nuummi Politiit ilisimatitsipput.
Inuit taakku sisamat inatsit tunngaviusoq naapertorlugu killisiorneqarput. Inuit marluk iperagaapput, kisianni arnaq 22-nik ukiulik angullu 17-inik ukiulik sapaatip akunneri sisamat tigummigallagassanngortinneqarput. Iperagaasut pillugit politiit ima allapput:
-Inatsit tunngaviusoq naapertorlugu killisiorneqarneranni paasinarsivoq taakku ujajaanermi peqataasimarpasinngitsut, taamaattumik iperagaapput, taama Nuummi Politiit ilisimatitsipput.
Nuummi Politiit sapaatip akunnerani 38-mi nalunaarsugaat
Angerlarsimaffinni eqqissiviilliortitsinerit 13-it.
Aqqusinermi eqqissiviilliortitsinerit sisamat.
Ujajaalluni saassussineq ataaseq.
Nakuusernerit arfinillit.
Pisiniarfinni tillinniarnerit15-it.
Tilliniarnerit16-it.
Aserorterinerit pingasut.
Imminut toqunniarlutik siorasaarisut marluk.
Imigassartorsimallutik biilersimasut marluk.