Nuummi toqutsisoqarpoq
Nuummi arfininngormat unnukkut toqutsisoqarsimaneranik politiit nalunaarfigineqarput.
Arfininngormat unnungaatsiartukkut Nuup illoqarfiani inissiat ilaanni, angut 58 –nik ukiulik toqungasoq politiinit nassaarineqarpoq, toqutsisoqarsimaneranik oqarasuaatikkut politiit nalunaarfigineqarsimasut, politeeq Bjøn Bay oqarpoq.
Politiit inissiamut apuummata, angut arlaannik ipittorujussuarmik kapoorneqarsimalluni aanaartitsisimaqaluni natermi nalasoq nassaarineqarpoq. Ikiueqqaanermik ikiorniarneqaraluarsimavoq kinguneqanngitsumik, angullu unnuap qeqqata missaani toqusutut nalunaarneqarsimalluni.
Kinguninngua angutip inooqataa arnaq 39 –nik ukiulik toqutsisimasutut politiinit tigusarineqarpoq. Taanna ippassaq sapaammi killisiorneqareerami sapaatit akunnerini sisamani tigummigallagassanngortinneqarpoq.
Arnaq taanna nammineerluni arfinngormat unnukkut Nuummi politiinut toqutsisimanini pillugu sianersimavoq.
Politeeq Bjørn Bay oqarpoq, Århus Universetet –miit aqagu Nuuliartoqalersoq angutip qanoq toqunneqarsimanera paasiniarlugu timaa misissorneqassammat.
Toqutsisimaneq paasineqarmat Nuummi politiit ikiortissarsiorlutik suleqatiminnik suliartoqqusisariaqarsimapput, maannalu immikkut paasiniaasussanik toqqaasoqarsimalerpoq.