Nuummi eqqumiiginartumik toqusut marluk pillugit naalagaaffiup politiivisa pinerluttulerinermik immikkoortortaqarfianneersut toqusoqarfimmi misissuisut maanna naammassipput. Taama oqarpoq vicepolitimester Bjørn Bay.
Takussutissat misissoqqitassanngorlugit Danmarkimi misissuisarfinnut nassiunneqarput.
Ilaatigut inuit kikkut toqusoqarfimmiissimanersut dna-mik misissuinerit takutissavaat.
Arnat toqungasut marluk sapaatip-akunnerata kingulliup ingerlanerani nassaarineqarnerisa kingorna Naalagaaffiup politiivi pinerluttulerinermik immikkoortortaqarfianeersut tikisinneqarput.
Nuummi Nuussuarmi inini marlunni imminnut 100 meteriunngitsumiluunniit ungasitsigisumi arnat marluk toqungasut nassaarineqarput.
Toqusoqarnerani siullermi angut sapaatip-akunnerini sisamani tigummigallagassanngortinneqarpoq.
Vicepolitimesterip Bjørn Bayip toqutsisoqarsimanersoq oqaatigerusunngilaa, suli misissuineq ingerlammat.