Nuummi Tivoli

Ukiut 21-t piumassutsiminik suleqataasartoq, Theodora Frederiksen Tivoleqarnissaanut erinisuttarpoq, meeqqat inersimasullu nuannisartut malinnaavigisaramigit.

-Tassa ulapinnartaraluaqaluni nuannertaaq, inuppassuit meeqqallu peqataasut isigalugit nuannersorujussuuvoq, aamma nalunngilarput meeqqat inersimasullu Tivoleqarnissaa qilanaarisaraat, Theodora Frederiksen oqarpoq.

Tivoli ullut pingasut ingerlanneqassaaq, sapaatiuppat eqqugassat annerit eqqorniarneqassallutik. Tallimanngornermi Tivoli ualikkut sisamanut ammaruni unnukkut qulinut matussaaq. Arfininngornermi sapaammilu ualikkut marluniit unnukkut qulit tungaanut ammassalluni.

Ulluni taakkunani isertinneqartut meeqqanik inuusuttunillu suliniuteqarfiit qinnuteqarfigalugit aningaasannaffigisinnaavaat, taassumalu saniatigut isertinneqartut allanut atorneqassallutik.

- Spejderit illuutaat aserfallatsaaliorneqarnera nammineq aningaasalersugarivarput, tassungalu aningaasarpassuit aamma atorneqartarput, taassuma saniatigut aamma eqqorniarneqartartut Danmarkiminngaanniit pissarsiarisaratsigit akisuupilussuusarput, taamaattumik aamma sinneqartoorutivut killeqartarput, Theodora Frederiksen oqarpoq.