Nuummi timmisartoq sisummat pissanganartoqarsimanngilaq

Timmisartoq Dash-8-eq mittarfimmit sisoormat ilaasut tallimat timmisartumilu inuttat pingasut tamarmik ajoqusinngillat.

Air Greenland naapertorlugu mittarfiup qanoq quasatsigineranik paasissutissat kukkusut pisuullutik timmisartoq sisusimavoq.

- Tassa timmisartoq Paamiunukaraluarluni utertoq, mereerluni sangusussanngorluni sisulluni mittarfiup killingatungaanut unittoq, Air Greenlandimi HR-imi pisortaq Mads B. Christensen, KNR-imut nassuiaavoq.

Air Greenland aamma paasissutissiivoq timmisartup kigaallannissaanut kisitsisit timmisartup aquttuanut paasissutissiissutigineqartut eqqorsimanngitsutut pasineqartut.

Timmisartoq Dash-8 Paamiuliaraluarpoq, tassanili mittarfik quasappallaarmat missinnaannginnami Nuummut utiinnarpoq. Nuummullu ullumi ataatsip qeqqata missaani minnermini mittarfiup kujataatungaani avammut sisoorluni.

Aamma atuaruk Timmisartoq Nuummi mittarfimmi sisusoorpoq

- Taamatut nipilimmik oqartoqarpoq, ilaasut sianigisimanngikkaat imatut pissusissamisuunngitsumik pisoqartoq aatsaat qatserisartut takkummata paasisimavaat susoqarnersoq. Pisorlu pissanganartoqanngitsoq Mads B. Christensen erseqqissaavoq.

Ilaasut tallimaasut timmisartumilu inuttat pingasut arlaannaalluunniit ajoqusinngillat.

Timmisartumi inuttat ullumi politiinit apersorneqarput, ilaasullu utaqqiisaasumik Sømandhjemmimut inissinneqarlutik.

- Taakani oqaloqatigineqariarlutik taava neqeroorfigineqarlutik arlaannik kingunerlutitsilissagaluarunik saaffiginninnissamik, taavalu aamma neriorsorneqarlutik uagutsinninngaanniit saaffigineqarumaarlutik, taasuma kinguneraniik Sømandshjemmimut inissinneqarput, takananiissapput qanoq ingerlaqqinnissatta tungaanut, Air Greenlandimilu sulisunut pisortaq Mads Christesen taama KNR-imut oqarpoq.

Ajutoornerit pillugit ataatsimiititaliap pisoq sukumiinerusumik misissuiffigissavaa.

Mittarfik 2 tiimi matoqqareerluni, Air Greenland ullumikkut nalunaaqutaq pingasunut naliginnaasumik timmisartuusseqqilerpoq.