Nuummi tillinniat tigusarineqartut
Nuummi tillinniat sisamanngormat tallimanngormallu imaaginnavissimasut Nuummi poliiteqarfimmi pigaartuusoq Johan Davidsen radioaviisimut nalunaarpoq.
Sisamanngornermi tallimanngornermilu unnuaani Nuummi Iggiaani angallatit 15-it missaanniittut tillinniarfigineqarsimapput. Tallimanngormat tillinniat 17-it tigusarineqarsimapput, taakkunannga pingasut tigummineqarallartussanngortinneqarlutik, sinneri 14-it iperarallarneqarsimapput nakkutigineqartussaallutilli.
Tillinniarfigineqartartullu tassaapput, angerlarsimaffiit angallatit, biilit kiisalu suliffeqarfiit.
Tillituut amerlanerit inuusuttuaraagajupput 15-iit qummut ukiullit. Politiit oqaatigaat tillinniat kikkuuneri paasiniarlugit misissuinerit maanna ingerlanneqartut. Nalunaarutigineqarporlu sisamanngornermi tallimanngornermilu tillinniat tigusarineqarnerisa kingorna tillitaasa ilaat politeeqarfimmi paarineqartut, tillinniarfigitissimasullu pigisaminnik tammaasaqartut qinnuigineqarput Nuummi politeeqarfimmut saaffigineqqullugit, tillitat politeeqarfimmiitinneqartut ilaat suli inuttassarsineqanngimmata.
Ukiup aallartinneraniit mannamut tillinniat 50-t nalunaarutigineqarsimasut Nuummi politiit ilisimatitsipput.
