Nuummi tikaagullinniat uparuaapput

Aalisarnermut Piniarnermullu Pisortaqarfiup ukioq manna tikaagullittassanik agguaassinera Nuummi aalisartut piniartullu peqatigiiffiannit naammagineqanngilaq.

- Arfattassiinermi inuup ataatsip ukiumut neqitortagaa aallavigineqartarpoq. Taamaattumik tikaagullittassanik maannakkut agguaassineq kukkusumik tunngaveqarluni suliaasoq nalunanngilaq, tassami Sisimiut Maniitsorlu tamarmik immikkut 20-nik tikaagullittassinneqarmata, Nuullu quliinnarnik tikaagullittassinneqarluni, Nuummi aalisartut piniartullu peqatigiiffianni siulittaasoq Nikolaj Heinrich allappoq.

Sisimiut Maniitsorlu katillugit 9000-it missaannaanni inoqarnera, Nuullu 15.000-it sinnerlugit inoqarnera erseqqissaatigaa.

- Tassuuna takuneqarsinnaavoq agguaassinermi inoqassuseq tunngavigineqarsimanngitsoq, allarluinnarmilli tunngaveqarluni agguaassisoqarsimasoq.

Sisimiut Maniitsullu kommuniinut tikaagullittassat eqqarsaatigalugit taakkunani innuttaasut ataasiakkaat agguaqatigiissillugu 9 kilomik neqinnakkumaartut, Nuullu kommuneani pisassat aallaavigalugit Nuummi innuttaasoq ataaseq 1,3 kiloinnarmik neqinnakkumaartoq, Nikolaj Heinrich tikkuaavoq.

- Tamanna arfattassiinerup anersaavanut naleqqutinngilluinnarpoq, taamaattumillu agguaassinerup nalilersoqqinneqarnissaa NAPP-mit piumasarilluinnarparput, Nikolaj Heinrich allappoq.