Nuummi taxartartoq saassunneqartoq
Nuummi politiit inunnik sisamanik, ullaaq nuummi taxartartumik saassussinermi peqataasunik ujarlerput. Angutit pingasut arnarlu ataaseq aalakoortut Nuussuarmut aaneqarsimapput, ilaasullu marluk tassanngaannaq taxartartoq saassussimavaat.
Saassussineq ullaaq arfineq-pingasut qeqqata missaani pivoq. Ilaasut allat marluk saassussisoqannginnerani qimaasimapput. Aquttup saassutinnermik kalerrisaarut toorsimavaa, minutsillu pingasut qaangiutiinnartut taxat allat 15-nit takkussimapput, saassussisullu qimaallutik. Politiit oqarput, taxartartoq quleria tunuanit sanianiillu tilluarneqarsimasoq.
Saassutsereernermi kingorna taxartartoq napparsimavimmi misissortippoq, anniarpoq tupassimaqalunilu, Nuuk Taxa nalunaarpoq.
Taxartartup saassutinnermik kalerrisaarut tooraangagu, taxap iluani assiliivimmit assilisat, sisamariaammik amerlisarput. Taamaammat Nuuk Taxa saassussisut assiinik politiinut tunniussisinnaavoq, politiillu saassussisut ujarlugit aallartipput. Maannalu Politiit nalunaarput tigusarinnissimallutik.
