- Inatsisit maleqqissaassavagut. Ilaasut nunaqarfimmut niussavagut, taava nunaqarfimmiittut peqatigalugit nannut pissangallutik isiginnaarumaarpaat, Ivik Ostermann oqarpoq.Assi: Minik Møller Petersen

Nuummi takornarialerisut nannunik takornariarnissamik neqerooruteqartut

Nuummi takornariartitsivik Greenland Cruises nannut pingajoqqat Qeqertarsuatsiaaniittut aqagu sisamanngornermi takornariarneqarsinnaanerannik neqeroorpoq.

- Nannut iluatsitsinikkut takusinnaagutsigit tupinnassaqaaq, kisianni soorunami sunnguamilluunniit uippakajaartinnagillu ajoqusersorusunngilagut, Greenland Cruisesimik piginnittoq Ivik Ostermann oqarpoq.

Greenland Cruises Qeqertarsuatsiaanut nannunik takornariartitsiniarluni aqagu ullaakkut arfineq pingasunut aallassaaq.

AAMMA ATUARUK Nannut pingajoqqat Qeqertarsuatsiaanut utertut

Nannut suli Qeqertarsuatsiaat eqqaanniinnersut Ivik Ostermannip qulakkeereerpagu, nalunaaquttap akunnerini sisamani takornariartitsissaaq.

Nannunik akornusersuineq

 

  § 4.  Nannunik qammaaneq, ujaasineq, malersuineq allatulluunniit akornusersuinissaq inerteqqutaapput.

  Imm. 2.  Taamaakkaluartoq nannunik ujaasisoqarsinnaavoq malersuisoqarsinnaallunilu inatsisit malillugit piniarnermut aallaaniarnermullu atatillugu, takuuk § 8, imaluunniit nannumik sumiiffimmiit qimaatitsiniarnerup ilaatut, takuuk imm. 3.

  Imm 3.  Politiit, piniarnermik nakkutilliisut, kommunefogedit, inuilluunniit allat pisinnaatinneqartut nannunik sumiiffimmiit qimaatitsiniarlutik ungoorineranni akornusersornissaat inerteqqutaavoq.

  Imm. 4.  Dronit nannunik filmiliornermut allatulluunniit malersuinermut atornissaat inerteqqutaavoq.

 

Greenland Cruises Qeqertarsuatsiaanut takornariartitsineq ajoraluarpoq.

- Nannunik qanittumiittoqarnera atorluarlugu takunissaq massakkut periarfissaavoq. Uanga nammineerlunga nanumik takunikuunngilanga, Danmarkimi uumasuusivissuarmiittut eqqaassanngikkaanni. Taamaammat nannut Qeqertarsuatsiaanut takornariarnissai pissanganartorujussuussasoq isumaqarpunga, Ivik Ostermann oqarpoq. 

Pingajoqqat ataasinngormat takkuttut

Nannut pingajoqqat ataasinngornermi nunaqarfiup eqqaanukarput. Nunaqarfimmiunillu nalunaaqutaq ataatsip missaani seqqortaarfigineqarlutik qimaatinneqarput - marlunngornermili uteqqipput. Uteqqimmata seqquusarfigalugit qimaatinniarneqaqqittariaqarsimallutik. Nannulli nunaqarfiup ullumi pingasunngornermi eqqaaniittuarsinnarput.

Nannut qanillattorneqaratillu ajoqusersorneqassanngitsut, Naalakkersuisoqarfiup peqqussutigaa.

AAMMA ATUARUK Nannut pingajoqqat Qeqertarsuatsiaat eqqaanniit qimaatinneqartut

Takornarniartitsisup Greenland Cruisesip nannut takornariarneqarpata maleruaqqusat unioqqutinnaviarnagit erseqqissaatigaa.

Nannut suli taqqavaniissappata, takornariartut Qeqertarsuatsiaat nunaqarfittaanut niussavagut, allatuulli nunaqarfimmiit isiginnaarniassammatigit. Taamaaliorneq nannunut qanilliniarinerunersoq naluara, taamatut isumaqanngilanga, Ivik Ostermann oqarpoq.

Naalakkersuisoqarfik ilaserineqartoq

Takornarniartitsinerup nalaani ilitsersuutit unioqqutinneqannginnissaat anguniarlugu, takornariartitsiviup naalakkersuisoqarfik takornariarnissaanut neqeroorfigaa.

- Inatsisit maleqqissaassavagut. Ilaasut nunaqarfimmut niussavagut, taava nunaqarfimmiittut peqatigalugit nannut pissangallutik isiginnaarumaarpaat, taanna oqarpoq.

- Nannut ornillugit qanillattornavianngilagut, inatsisit maleruaqqusat tamakkiisumik malissavagut.

Takornariarusullutik nalunaartut maannamut pingasuupput, allanillu aamma soqutiginnittoqartoq, Ivik Ostermann oqarpoq. Ilaarusullutik nalunaartut aatsaat naammatsippata takornariartoqarsinnaasoq, taana oqarpoq. Takornariarluni ilaaneq 2.000 koruuneqarpoq.

Takornariarlutik peqataasussat arfinilinngorpata, nannunik takornariarneq piviusunngortinneqarsinnaavoq.

- Aalisarnermut, Piniarnermut Nunalerinermullu Naalakkersuisoqarfik nannunik takornariarnissamut qaaqqugitsik Greenland Cruises oqarpoq.

Ungasianiit qinnguserluta nannut takugutsigit, ajornartorsiutaanissaa takujuminaatsippara.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat