Nuummi Sullorsuarmi akiliisitaasorpassuit
Kalaallit Nunaanni Politiit Facebookikkut quppernerminni taama ilaatigut allaaserisaqarput.
Angallattut amerlanerit angumersiniaanermi sukkavallaartumik ingerlasarsimasut, Sullorsuarmi angallattut nakkutigineqarneranni aamma paasinarsivoq. Angallannermi aalajangersakkat naapertorlugit akunnermut annerpaamik kilometerinik 30-inik ingerlasoqaqqusaavoq.
- Pisuinnaat, meeqqat utoqqaallu, cykkilertullu Sullorsuup inissakinnera pissutaalluni navianartorsioratarsinnaareersut, taamatullu qaamanerani Sullorsuarmut pulanermi isigisap annikikkaluamik killeqaratarsinnaanera eqqarsaatigeqqunarpoq, Kalaallit Nunaanni Politiit taama oqarput.
Pissutsillu Sullorsuarmi ukiukkut ajorseriarsinnaanerat, assersuutigalugu erngup kuserartup qerruttarnera, aqqusernup quatsersinnaanera pissutsillu allat ukiuunerani atuutilersartut politiit ilanngullugu eqqaasitsissutigaat.
- Akiligassitaasinnaaneq eqqarsaatigivallaarnagu, kisiannili pisuinnaat toqqissisimasumik Sullorsuakkoorsinnaanerat eqqarsaatiginerullugu Sullorsuarmi angallannermi maleruaqqusat taamaammat maleqqunerput, Nuummi Politiit taama naggasiipput.
