Nuummi suliniut "Sapiik" aningaasaliiffigineqarpoq
Inuusuttut ilinniagaqalernissamik kajuminnerulernissaannut suliniut, Sapiik, peqagiiffimmit Grønlandske Børn-imit aallartinneqartoq, aningaasaliiffigineqarpoq, tamaalilluni 2009-mi ingerlanissaa qulakkeerneqarluni.
Allattoq Louise M. Kleemann
Assigiinngitsut aningaliinerisigut Sapiik 807.640,00 koruuninik aningaasaliiffigineqarpoq. Inuusuttut, ingammik nunaqarfinni inuusuttut ilinnigaqalernissamik piumassuseqalernissaat anguniarlugu suliniut Sapiik 2008-imi aallartinneqarpoq.
Meeqqat atuarfiini atuartut imminnut tatiginerulernissaat, akisussaaffimmik annertunerusumik tigusisinnaanissaat pisinnaasaqarnerulernissaallu suliniummi siunertarineqarpoq, tamakku tamarmik anguneqareerpata ilinnialernissaminnut piareersimassammata, peqatigiiffik Foreningen Grønlandske Børn tusagassiuutinut nalunaarummini allappoq.