Nuummi suliffissaaleqisut ataatsimiisinneqarput

Inuttut ineriartornermi pikkorissarnissamut soqutiginnilersitsiniarnermut aallarniutitut, suliffissaaleqisut ataatsimeeqatiseralugit, ippassaq ullaakkorsioqatigiinnermik aallarnerlugu, Sullissivik Nuummit, Katuami ataatsimiisinneqarput.

Pikkorissaqataareersimasut saqqummiussinerminni, periuseq ingerlaannallaqunartutut nalilerpaat.

Ukiut 17-it ataavartumik suliffeqarsimanani, inuttut ineriartornermi pikkorissarnermut peqataareerluni, 38-inik ukiulik, Birgitte Bech ingerlariaqqikkusunnini pillugu ima oqarpoq:

- Aalajangersimavunga uninngaannarnanga suliffittaarusullunga. Pikkorissarnermut peqataaninni malugisinnaasutut paasisutullu ippara tusaaneqarnissara pisariaqartissimallugu.

43-nik ukiulik Kaj Sandgreen, ilinniagaqarsimagaluarluni, ukiut tallimat suliffissarsiortooreerluni, pikkorissaqataanngikkallarami imminut nalligaluni ingerlaqqiffissani takusinnaajunnaarsimagaluarpaa:

- Imminut nallinnartutut isiginikuugaluarlunga, pikkorissarnermut peqataaninni takusinnaanngorpara pereersimasut aqqusaartussaagivut.

Inuunermalu qanoq ingerlasimanera aamma takusinnaanerulersutut ippara.

Siunissami kissaatiginarpoq, inuttut ineriartornermi pikorissartitsisarnerit ingerlatiinnarneqassasut. Sinerissami aamma atorneqalersinnaanera piukkunnarpoq, iluaqutaasinnaalluarmat, Kaj Sandgreen naggasiivoq.

Suliffissaaleqisunik ataatsimiisitsinerit, Sullissivik Nuummit aappassaa aaqqissuunneqarpoq.

Inuttut ineriartornermik pikkorissartitsinerit pingasoriarluni ingerlanneqarmata, inuit 38-it peqataapput. Ukiup matuma naannginnerani naatsorsuutigineqarpoq, marloriarluni Nuummi pikkorissartitseqqittoqassasoq.