Nuummi suliffeqarfik ikuallattoq
Qatserisartut unnuaq nalunaaqutaq ataasinngulersoq ikuallattoqarneranik kalerrinneqarput.
- Siulliullunga takkukkama isaariaa tamarmi ikuallappoq, qatserisartullu apuutipallapput. Ikuallannera qamikatsigu illup iluaniittut tamarmik nungullutik ikuallassimasut takuarput, upalungaarsimanermut pisortaq Knud Petersen KNR-imut oqarpoq.
Ikuallattoqarneranik qatserineq nalunaaquttap akunnerata affaanik sivisussuseqarpoq, nalunaaquttallu akunneri pingasut qaangiummata ikuallaffiusoq Qatserisartut qimappaat.
Suliffeqarfik Sømandshjemmip sanianiippoq, qujanartumillu inunnik ajoqusertoqarsimanngilaq illullu ikuallaffiusup sanianiittut aamma ajoqusersimanatik.
Ikuallanneq qanoq pisimanersoq politiit misissuiffigileruttorpaat.
O.S. Electronic umiatsiat atortorissaarutaanik elektroniskinik pilersuisuullunilu umiarsuit atortuinik iluarsaassisarfiuvoq.
