Nuummi skunkimik naatitsisimasoq nalaatsornerinnakkut paasisaasoq

Nuummi politiit sapaatit-akunnerani qaangiuttumi pisut pillugit nalunaarusiaanni atuarneqarsinnaavoq sisamanngormat unnuakkut Blok 6-imi ikuallattoqarneranut atatillugu "naasunik skunkinik naatitsivimmik" nassaartoqarsimasoq.
Assi © : Borja Iza/Flickr Creative Commons
Allattoq Karsten Sommer
decembarip 08-at 2014 09:23
Nutserisoq Simon Uldum -

Skunk tassaavoq naasoq marihuana sananeqataatigut allanngortitigaq, blok 6-imilu inissiamik ikuallattumik qatserinermut atatillugu inissiap saniliusut arlaata politiinit immikkut misissortariaqarneranik qatserisartut ilimatitsissuteqarsimapput.

AAMMA ATUARUK Nuummi unnuaq ikuallarujussuartoqartoq

- Inissiap misissuiffigineqarnerani naasunik skunkinik naatitsiviliortoqarsimanera paasivarput, politikommissær Poul Petersen Radioaviisimut oqarpoq.
 
Angut inissiamiittoq politiinit tigusarineqarpoq, taassumalu naasunik nammineq atugassaminik naatitsisimalluni nassuerutigisimavaa.

Naasut skunkit katillugit 920 grammit nassaarineqarsimapput.

 

Nammineq atugassaminik naatitsisimanerartoq
- Killisiorneqareermat iperagaavoq, naasumillu ikiaroornartumik unioqqutitsilluni naatitsisimasutut unnerluutigineqassaaq eqqartuussivimmullu suliassanngortinneqarluni, Poul Petersen Radioaviisimut ullaaq manna taama oqarpoq.
 
Pisoq taanna eqqaassanngikkaanni, sapaatit-akunnerata siuliani sapaatit-akunneratalu naanerani Nuummi pisoqarpallaasimanngitsoq, politiinit oqaatigineqarpoq, sapaatit-akunnerata naanerani julefrokostertorpassuaqaraluartoq imigassartorsimatilluni biilertunik naammattuuisoqarsimanngitsoq nuannaarutigalugu aamma oqaatigaat.

 

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk