Nuummi Sisimiunilu nutaalianik qitinnermik isiginnaartitsisoqalersoq
Qitittartut Next Zone Nuummi Nunatta Isiginnaartitsisarfiani arfininngorpat sapaatiuppallu unnukkut nalunaaqutaq arfineq-pingasunut isiginnaartitsissapput, RUNES - "Runet arfineq-marluk" nunani avannarlerni upperisatoqqat vikingillu nalaanni pisut isumassarsiorfigalugit qitinnermik isiginnaagassiaq takutinneqassalluni.
Vikingillu oqaluttuatoqaannik isiginnaagassiami qitittartut nunani tamalaaneersut arfineq-pingasut peqataassapput, breakdancertartut, balletimik nutaaliaasumik qitittartut kiisalu cirkusimi isiginnaartitsisartut, Nunatta Isiginnaartitsisarfia taama allappoq.
Next Zone aamma aalaatsinik ilusilersuisartoq Lene Boel siornatigut nunatsinni angalasimapput, qitinnermik isiginnaagassiaq RITUAL iluatsilluartumik angallassimallugu.
Tamatumuuna aamma ilitsersuisartoq qitittartuilu sinerissami angalassapput.
Next Zonemi qitittartut Nuummiissinnarlutik Sisimiuni kulturikkut illorsuarmut Taseralimmut ingerlaqqissapput, tassanilu pingasunngornermi oktobarip tallimaani isiginnaartitsissallutik.
