Nuummi Sisimiunilu aliikkusersuilluni katersuiniarnissat
Asiami ajunaarnersuarmik eqqugaasunut ikiuiniarnermut katersuiniarluni Nuummi Inussivimmi aqagu tallimanngornermi tusarnaartitsinissamut programmi piareersoq, aaqqissuisunit nalunaarutigineqarpoq.
Tusarnaartitsineq unnukkut arfineq pingasunut ammarlugu aaqqissuisunit nunatsinni arpattartoq tusaamasaq Kim Godtfredsen tikilluaqqusissaaq Nuullu brogmesteria Agnethe Davidsen aamma oqalugiassalluni.
Tamatuma kingorna minutsimi ataatsimi nipaallisimaneqareerpat tussiartoqareerpallu tusarnaartitsineq aallartissaaq, tassanilu Nuummi nipilersortartut assigiinngitsut tulleriaarlutik unnuaqeqqata tungaanut appisimaassapput.
Nipilersortullu akornatigut ”Kaalisaaq” aamma aliikkusersuisinneqartassalluni.
Aaqqissuisunillu nalunaarutigineqarpoq katersuiniarnermi nipilersoqatigiit soorlu Sumi, Qarsoq, Simik, Kalak, Nuutit, DDR, Siiva Fleischer Tupaarnaq, Angu, Sista, Jens aamma John tusarnaariarneqarsinnaajumaartut.
Tusarnaartitsinissami Kalaallit Røde Korsiat aaqqissueqataavoq. Iserneq 25 kroneqassaaq, akiliinerorusuttulli akiliinerusinnaallutik.
Ilulissanissani aamma unnugu katersuiniartoqassaaq. Tassa Ilulissat kulturikkut illorsuanni Sermermiuni ajunaarnersuarmi eqqugaasunut katersuiniussineq unnugu nal. arfineq marluniit unnuarorneranut ingerlanneqassaaq. Tassani nipilersortartut, qitittartut isiginnaartitsisartut, piginnaanillillu aliikkusersuissallutik. Katersuiniarneq ammarlugu Ilulissat borgmesteriat Anthon Frederiksen oqalugiassaaq, katersuiniarnermilu sutugassaqartitsisoqassalluni, Ilulissani Sermermiuni unnugu arfineq marluniit katersuiniarnissami aaqqissuisut nalunaarput iserneq inersimasunut 20 kroneqassasoq meeeqanut 10 kroneqassalluni.
