Nuummi sila nalliuttorsiornermut sunniuteqarpoq - Qaqortumiinngitsorli

Inuiattut ullorsiorneq pisarnertut nalliussineqarpoq.

Naalagiarnerit, oqalugiarnerit, saqqummersitsinerit tusarnaartitsinerillu ingerlanneqarsimallutik.

Silalu apeqqutaatillugu pilersaarutit allanngortarsimapput.

Soorlu Nuummi pilersaarutit taamaassimasut.

Silami pisussaagaluit Nuup timersortarfissuanut pisussanngorlugit ingerlanneqarput, timersortarfissuarmillu aqutsisoq Jens Berthelsen ima oqarpoq:

- Sila ajoriarmat timersortarfik ornigarneqarluarsimavoq. Siornamut naleqqiullugu amerlanerugunarput, Jens Berthelsen oqarpoq, nangillunilu:

- Inuit tattoqisaajusallutik isersimarrapput, nuannisartorujussuupput.

Nuummi timersortarfimmi aqutsisoq Jens Berthelsen taama oqarpoq.

Aammattaaq Qaqortumi nalliuttorsiortoqarpoq.

Qaqortup Katersugaasiviani saqqummersitsinermik ammaasoqarpoq.

Saqqummersitat tassaapput ukkusissanik kigutilissuullu kigutaannit qiperukkat 85-it immikkuullarissut:

- Immikkuullarissutut taaneqarsinnaapput. Qiperukkat privatimik pigineqarput, imaaliallaannarlu saqqummersinneqarsimanatik, Kujataata Radioani suleqaterput Jørgen Semionsen oqarpoq.

Qaqortumi sila qulisimagaluartoq pilersaarutaasimasunut sunniuteqarsimanngillat. Pisarnertut Qaqortumi innuttat illoqarfiup qeqqani tissaluttup eqqaani katersuussimapput, grillerillutik, allatullu aliikkusersuinertaqarsimalluni.

Katersugaasivimmi saqqummersitat qiperukkat Aron Kleistiugaluamit paniatalu Cecilie Kleistimit suliaapput.