Nuummi septembarimi inunngortussarpassuit

Nuummi arnat 45-t septembarip ingerlanerani ernisussatut naatsorsuutigineqarpoq. Naartusut 16-it illoqarfinniit nunaqarfinniillu allaniit erniartortuupput. 

- Naartusut tamarmik sinerissameersut arlaatigut ernumanartoqarsinnaasut siunnersortarpagut Nuummut erniartussasut, Dronning Ingridip Napparsimmavissuani immikkoortortaqarfimmi juumooq Signe Kaack taama oqarpoq.

Septembarimi ernisussat taama amerlatiginerannut immikkoortortaqarfimmi juumuup nassuiaatissaqartinngilaa.

Kingumoorlugu kisitsigaannili erseqqarissivoq meeqqat inunngortussat juullip kingorna januaarimi sanaajusimassasut.

Ukioq manna qaammat inunngorfiunerpaaq tassaavoq juuli, qaammat taanna naalungiarsuit 46-t Nuummi napparsimmavimmi inunngormata.  Agguaqatigiissillugu qaammatip ataatsip ingerlanerani napparsimmavimmi naalungiarsuit 30-t 35-t inunngortarput. Dronning Ingridip Napparsimmavissuani ukioq manna 2012-imi massakkumut 276-it inunngorput.