Nuummi savilersortoqartoq
Angutip taassumap angut alla savimmik kapisimavaa, kapineqartorlu inuunerminik ulorianartorsiunngitsoq, Nuummi politiit pigaartuat Johan Vessten oqarpoq.
Savimmik kapisineq pivoq ippassaq ualikkut Nuummi Narsarsuarmi inissiat blok 9-ip blok 10-illu akornanni. Angut savimmik kapisinermi kingorna qimaasimavoq. Savimmik kapisinerup nalaani takunnittut ikiorsiullugit angut politiinit nassaarineqarpoq, isertitsivimmullu inissinneqarluni. Angut tigusarineqarnermi nalaani imigassartorsimavoq, Nuummi politiit nalunaarput.
Angut savimmik kapisisoq ullumi Nuummi eqqartuussivimmi killisiorneqarluni eqqartuunneqarpoq, toqutseriarsimasutullu pasineqarluni sapaatit akunnerini sisamani tigummigallagassanngortinneqarluni.
Angut savimmik kapineqartoq pillugu Nuummi politiit annertunerusumik oqaaseqarusunngillat, angutilli taakkua marluk imminnut ilisarisimasimasut oqaatigineqarluni. Angut savimmik kapineqartoq inuumerninik ulorianartorsiunngilaq, taanna Nuummi nakorsiartarfimmit ippassarli angerlereersoq, Nuummi politiit oqaatigaat.
