Nuummi savilersortoqarpoq
Nuummi politiit paasissutissiipput, angut inuusuttoq savimmik arlaleriarluni tallimanngornermi unnuaagaa kapineqarsimasoq. Pisumut tamatumunnga tunngatillugu tigusarinnittoqarsimavoq inatsisillu tunngaviusut naapertorlugit killisiuisoqarsimalluni.
Allattoq Apollo Jeremiassen
decembarip 02-at 2012 09:32
Ippassaani unnuami pisumut politiit paasissutissiineri suli killeqarput. Sermitsiaq.ag-illi nittartagaatigut allaaserineqarpoq, savimmik kapisineq, Blok 5-imi inissiat ilaanni, erngunnerup nalaani pisimasoq.
- Angut inuusuttoq kapineqartoq, Nuummi Dronning Ingridip napparsimmavissuanut unnuaq unitsinneqarpoq, maannali pitsanngoriartortoq oqaatigisinnaallutigu, Nuummi politiit Sermitsiaq.ag-mut oqaatigaat nangillutillu.
Nuummi politiit arfininngornermi ualikkut tusagassiutinut nalunaarput, angut 22-nik ukiulik tigusarineqarsimasoq, taannalu toqutseriarsimasutut unnerluunneqassasoq. Angut tigusarineqartoq ulluni 28-ni tigummigallagaassasoq, politiit nalunaarutigaat.
