Assi: KNR / Malik Brøns

Nuummi sarfaarunneq: Kommuni ima upalungaarsimavoq

Nuummi sarfalersuinerup aalaakkaannginnera kommunip kissartuussivianut aamma ilungersortitsivoq. Taamammat kommuni ajornartoornermi upalungaarsimanermik atulersitsivoq.

Nukissiorfiimmi illoqarfiit pingaarnersaannut sarfalersuinera suli aalaakkaanngilaq.

Taamaammat kommuni ajornartoornermi upalungaarsimanermik atulersitsivoq. Kommunip upalungaarsimanini ima inissisimasoq allappaa:

Ikuallattoqartillugu upalungaarsimaneq

Upalungaarsimaneq nalinginaasumik ingerlavoq. Telefonit atorsinnaajunnaassappata qatserisartut biilii pingasut illoqarfimmi angalaaginnalissapput, inuttaasut qatserisartunik attaveqarsinnaaniassammata.

Utoqqaat innarluutillillu

Sarfaqartillugu ornigullutik ikiuuttartut nalinginnaasuumik sulissapput, sarfaarutsillutali ornigullutik ikiuuttartut upalungaarsimallutik sulissallutik.

Utoqqaat innarluutillillu imermik kiassarnermillu amigaateqarunik Kommuneqarfik Sermersuumut ulloq unnuarlu saaffiginnissiinnaapput, telefonimut uunga: 32 10 16.

Telefonit atorsinnaajunnaassappata Kommuneqarfiup allaffianut innuttaasunik sullissivimmut saaffiginnittoqarsinnaassaaq.

Inuusuttut immikkut pisariaqartitsippata

Meeqqanik ilaqutariinnillu sullissivik ulloq unnuarlu sisamanik sulisoqarpoq. Telefon normut ulluinnarni atorneqartut atoqarneqassapput. Taakku ajorpata uku sianerfigineqarsinnaapput: 32 10 15, 55 57 31 imaluunniit 52 97 74. Telefonit taakku aamma ulloq unnuarlu tiguneqartarput.

Telefonit atorsinnaajunnaassappata ammarsarfiit nalinginnaasut iluanni Imaneq 20-mut takkulluni saaffiginnittoqarsinnaavoq.

Meeqqeriveqarneq atuarfeqarnerlu

Sarfaqartillugu atuarfiit paaqqinnittarfiillu ammassapput. Taakkuli tamarmik meeqqanik pingaarutilimmik pisariaqarluinnartumillu suliffeqartunik angajoqqaalinnik paarsissapput.

Innersuussutigaarput periarfissaq tamanna pisariaqavitsillugu aatsaat atorneqassasoq, sivisuumik sarfaarutsillugu kiassaaneq eqqiluisaarnerlu ajornakusuulissammata.

Isumaginninnermik sullissineq aamma innuttaasunik sullissineq

Sarfaqartillugu Kommuneqarfik Sermersuumi inunnik isumaginninnermik sullissiviit nalinginnaasumik ammassapput. Qamittoortoqartilluguli matoqqassallutik.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl