Nuummi saarullinniat qeeqqanik qaleralinnillu aalisarnissaannik kajumissaarneqarput
Aalisartut Royal Greenland isornartorsiorpaat, ullormut 8 tonsit missaannik taamaallaat tunisisinnaagamik tunisiniarnerminnilu utaqqisariaqartaramik.
Paaviaaraq Heilmannip tusagassiuutinut nalunaaruteqarluni allagaqarnermini oqaatigaa, saarullinnik tunisinermi piffissami sivitsortumi killilersuisoqartariaqarnera arlalinnik patsiseqartoq.
Siullermik aalisartut tulaassuilinnginnerminni nalunaaruteqartartussaatitaanertik eqquutitsittarsimanngilaat, taamaalilluni tulaassaat Royal Greenlandimi tigooraasunit naatsorsoruminaattarluni.
Tamatuma saniatigut saarulliit nunarsuarmi akii apparaluttuinnarput, taamaalilluni nioqqutissiornermi aningaasartuutit malinnaasinnaanatik isertitanik matussuserneqarsinnaasannginnamik.
Taamaattumik Royal Greenlandip pilersaarutiginngilaa ullumikkut
Nuummi nioqqutissiorsinnaassutsip annertusarnissaanut aningaasaliinissani. Ullumikkut ullormut 8-10 tonsit tulaassorneqarsinnaapput, Paaviaaraq Heilmann erseqqissaavoq.
Nuummi aalisartut Paaviaaraq Heilmannimit kajumissaarneqarput saarullinniaratik aalisarnertik qeeqqanut qaleralinnullu
saatinniassagaat, tamanna aalisartunut Royal Greenlandimullu aningaasatigut iluanaarnarnerussammat.
