Nuummi ruujorilerisut akinik isumaqatigiissusiorneq ajorput

Unammilleqatigiinnermik nakkutilliisoqarfik politiit suleqatigalugit Sulisitsisut Peqatigiiffiannut Nuummilu suliffeqarfinnut ruujorilerisunut arlalinnut, siorna novembarip ulluisa 19-ianni, pakasaallutik misissuipput.
Allattoq Elisa Isaksen
februaarip 13-at 2014 08:44

Pineqartut suliassiissutigineqartunut akinik isumaqatigiissuteqartarsimanerannik pasineqarnerat tamatumunnga patsisaavoq. Pakasaalluni misissuisoqarnerani allagaatit arlallit oqartussanit arsaarinnissutigineqarput.

Maannali qaammatit sisamangajaat qaangiutillartullu pasineqarnerat pissutissaqanngitsoq paasinarsivoq.

Unammilleqatigiinnermut nakkutilliisoqarfiup misissuinini naammassisimalerpaa - tusagassiuutinullu nalunaarumminni allapput, ruujorilerisut taartissamaatinut tunngatillugu akinik isumaqatigiissuteqartoqartarsimaneranik takussutissaqanngitsoq.

Taamaattumik Unammilleqatigiinnermut nakkutilliisoqarfik suliamut pineqartumut tunngatillugu iliuuseqaqqinnianngilaq, tassa kingusinnerusukkut pasinarsinnaasunik suliassaqaleriataassanngikkunik.

Taamaattorli unammilleqatigiinnermik nakkutilliisut paasiuminaalaartumik ilanngullugu oqaatigaat, suli misissugassaqarlutik. Tamannali maannakkuugallartoq annerusumik oqaaseqarfigisinnaanngikkitsik.

- Matumanili erseqqissarneqassaaq suliffeqarfiit misissuiffigineqartut ingerlatseriaasiat matumani pineqanngimmat, kisiannili ataatsimut piumasaqaatinut, sullifeqarfinnut Nunatsinniitunut, tunngasuummat, issuaaneq naavoq.

Tamannalu kingusinnerusukkut tusagaqarfigissajunnarsivarput.