Nuummi qinersiartortut procentinngorlugu ukiormanna amerlanerupput

Nuummi innuttaasut 2009-mut naleqqiullugu amerlangerungaatsiartut oqartussaaqataanertik ukiormanna atorpaat.
marsip 12-at 2013 19:26

Inatsisartunut qinersinermi ukiormanna 73,16-it qinersisimapput, 2009-mi qinersisut 64,65 procentiusimallutik. Nuummi qinersinermik aqutsisup tamanna nuannaarutigaa:

- Nuummi qinersisinnaatitaasut 70 procentii sinnerlugit ukiormanna qinersiartorsimanerat nuannaarutigeqaarput. Tamat oqartussaaqataaneranni annerumik akissusaaqataarusussuseqarnermut ersiutaavoq, tamannalu nuannaarutigeqaarput, qinersinermi aqutsisoq Karno Lynge oqarpoq.

Nuummi nutaatut kulturikkut illorsuaq Katuaq qinersivittut ukiormanna atorneqarpoq, aamma nuannerluinnarpoq, qinersinermi aqutsisoq, Katuap qinersivittut atorneqarnissaanik aalajangersimaneq pitsaalluinnartoq erseqqissaatigalugu:

- Qiterpasissumiippoq, suliffeqarfippassuarnut qanittumiilluni, ornigarneqarluartarpoq aammalu inissaqartitsilluarluni. Qinersisitsineq ajornartorsiutitaqanngitsumik ingerlavoq, qinersisartoq ataaseq kukkusoqarsimanera pissutigalugu qinersisinnaasimannginnera eqqaassanngikkaanni. Uggornarpoq ajuusaarnarlunilu. Taamatut pisoqannginnissaa sapinngisarput tamaat pinngitsoortinniartarparput, ajoraluartumilli kukkusoqarsimavoq, tamannalu ajuusaarnarpoq, Karno Lynge oqarpoq.