Nuummi Qimarnguik matuneqassaaq

Nuup Kommuneanni Qimarnguik ukiuni 21-ni atuutereerluni kommunimit ukiortaamit atorunnaarsinneqarnialerpoq. Qimarngusartut affaasa qimarnguimmut uteqattaartarnerat tamatumunnga pissutaasoq kommunep matusinialernerminut tunngavilersuutigaa.

Qimarnguiup matuneqarnialerneranut akerliussutsimik inuit 75-it missaaniittut ippassaq takutitsipput, qimarnguimmi siulittaasoq Nukakkuluk Kreutzmann tamanna pillugu ima oqarpoq:

- Akerliussutsitsinnik takutitsigaluarluta qinikkat rådhusip silataani oqalugiartut imatut misigitippaatigut, tusaajumaneqanngilasi, aalajangereerpugut tassa taamaassaaq. Taama oqarpoq qimarnguiup siulersuisuini siulittaasoq Nukakkuluk Kreutzmann ullumi akerliussutsimik takutitsereernerup kingorna.

Nuup kommunalbestyrelsiata isumaginninnikkut aaqqissuusseqqinnerminut atatillugu qimarnguik atorunnaarsillugu allamik periaaseqalerniarput. Siullermik illu atorunnaarseriarlugu tuniniarniarpaat, tuniniarneranilu iluanaarutaasut sullissivittaassamut allatut suleriaaseqartussamut atorneqassapput, aappassaanillu qimarnguimmi qimarngusunut ikiueriaaseq allanngortinniarneqarpoq, taallugu ilaqutariinnut sullissineq.

Arnat aapparminnit persuttarneqarlutik qimarnguimmut meeqqatik ilagalugit qimaasartut sullinneqarneranni periarfissaalatsisoqalissasoq, sipaarnertullu isigineqarsinnaangitsoq qimarnguiup siulittaasua isumaqarpoq.

- Saaffiginnittartut amerlareertigisut, taama annikitsigisunik inissaqartinneqalissappata kingunerisinnaavaa ajornartorsiortoqarnerulernissaa. Illup tuniniarnera ataasiaannartumik isertitsiffiusussaavoq, kisianni Namminersornerullutik Oqartussanit ukiumut 311.000 koruunit isertittakkat, taakku soqutigineqanngillat, uffa iluaqutaakutsooraluartut, taamaattuik sipaarniarneq sumiittoq takusinnanngilara.

Qimarnguimmi siulittaasup tullia Kaali Olsen isumaqarpoq ullumikkut ingerlaaseq suli pitsaalluinnartoq.

- Isumakulunnarpoq aamma maani ilisimasat periutsillu inerisarneqarsimasut suleriaasinngorsimasullu tammaannartussaapput, sulisooreersut allamut qinnuteqarnerisigut, Kaali Olsen erseqqissaavoq.

Nuup Kommuneani isumaginninnermut pisortaq annerusumik nassuiaateqanngilaq pilersaarutillu nutaat suli ingerlanerarpai allanngortinneqarnaviaratillu, annerusumillu tunngavilersuutigaa qimarngusartut affaat qimarnguinnut uteqattaartarmata periaaseq allanngortinneqassasoq.

Nuup kommunalbestyrelsiata aappagumut aningaasartuutissat ataasinngorpat isumaqatigiissutiginialerpagit qimarnguiup siunissaa ilanngullugu aalajangerneqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat