Nuummi privatit imermik tunisassiorfiliorniarput
Sooruna imermik minguitsumik peqareerluta imermik nunanit allanit tikisitsisartugut? Nuummi suliffeqarfittaassaq aqqaneq-marluk angullugit sulisoqarsinnaasoq pilersinniarneqarpoq. Imermik puiaasanut ½ liiterinut suliffeqarfinnullu 20 liiterinik tunisassiorfissaq aallartitsiniartut marluk pilersaarusiarileruttorpaat. Imeq tunisassiassartik ”Imeq”-mik taaguusereerpaat. Isumassarsisup aappaata, Poul Egede Jensen-ip, pilersaarutitik ima oqaluttuarai:
- Aallaqqaammut suleqatigiileqqaaratta ullulimisaartaraluarparput. Kiisa ullulissaarparput. Aporfiit tulleriiaartarpagut. Illulernerinnaq eqqarsaatigalugu ukioq ataaseq sinnerlugu pilersaarusiornerput sivisussuseqassaaq. Akuersissutit
tamaasa pissagaanni sananeralu taama sivisutigisarami. Tamatta immikkut suliffeqarpugut tamakkulu tamaasa ataatsimut isigalugit taama sivisutiginissaa ilimagaarput. Iluatsilluartumik ingerlatitsissagutta ukiut arlallit qaangiuppata aatsaat aallartitsisinnaavugut. Taamaattuttaaq nunatta avannaani kujataanilu taamatut pilersaarutillit ingerlasartut tusartarpagut, Poul Egede Jensen oqarpoq.
- Nunanut allanut tunisaqarsinnaanerput pilersaarutigaarput. Namminersornerullutik Oqartussat Washingtonimi nittarsaassimmata ilaaninni puujaasaq imermik imalik takusassiatut nassarnikuuara. Tunisassiarineranilu pilersaarutigaarput ”Imeq”-mik taguusernissaa. Nittarsaassininni taagutigineqartoq amerikamiunit torragineqarmat aalajangerpugut taamatut taaguteqartiinnarniarlutigu. Tunisassiornerup tungaatigut sungiusarlualaariarluta aatsaat nunanut allanut tunisassiulernissarput ilimagaarput. Poul Egede Jensen oqarpoq.
Nuummi mittarfiup Qinnguttalu akornanni suliffeqarfiup inissisimanissaa ilimagineqarpoq, minnerpaamillu koruunit en millioni missaat aningaasartuutigineqassangatinneqarput.
Inuussutissarsiornermik inerisaaviup, Insitu-p, imermik tuniniaaviliornissaq suliniutigaa sullivinnillu aallartitsiniartut marluk tassapput Poul Egede Jensen aamma Jens Christian Berthelsen.
