Nuummi politiit: Unnuaq ulapiffiunngilaq

- Eqqissisimavugut, ulapinngilagut, politiini pigaartut pisortaat Aqqaluk Petersen oqarpoq.

Ippasaq arfininngornermi ullaakkut nalunaaqutaq 08.00 imerniartarfiit, neriniartarfiit sutorniartarfiillu ammaqqinneqarput.

Nuummi neriniartarfiit, sutorniartarfiit imerniartarfiillu tamarmik coronavirus siammatsaaliorniarlugu marsip ulluisa 18-ianni matuneqarput.

AAMMA ATUARUK Nuummi nujalerisut timigissartarfinnilu sulisut: Ulloq nuanneqaaq

Ullullu 39-t matoqqareerlutik ippassaq arfininngornermi ammaqqissinnaanngorput.

Akerlinganik pisoqarpoq

Politiit sapaatip-akunnerata naanerani ulapingaatsiarnissartik ilimagigaat, politimesterip, Bjørn Tegner Bayip tallimanngormat oqaatigigaluarpaa.

- Sapaatip-akunnerata naanerani imminut paarigisi, taanna tusagassiortunik katersortitsinermi taama kaammattuuteqarpoq.

AAMMA ATUARUK Politimesteri: Sapaatip-akunnerata naanerani imminut paarigisi

Akerlinganilli pisoqarpoq, unnuaq politiinut ulapiffiusimanngilaq. Politiini pigaartup imerniartarfinni sulisut nersualaarpai.

- Imerniartarfinni sulisut sulilluaqaat, nersualaarpagut. Malittarisassanik unioqqutitsisoqanngilaq, inuit eqqissisimapput, Aqqaluk Petersen oqarpoq.

Illoqarfiit pingaarnersaat sapaatip-akunnerani matumani ammariartoqqilerpoq. Tamanna coronavirusumik tunillatsissimasunik nutaanik Nuummi paasisaqartoqannginnerani ullut 20-nngorneranik pissuteqarpoq.