Nuummi politiit ulappussimapput

Nuummi politiit sapaatip-akunnerata naanerani assut ulappussimapput, pingaartumik tallimanngornerup unnuaani. Inuit arfinillit tigusarineqarput.

Angut 18-inik ukiulik pissutissaqanngitsumik angummik allamik saassussisimavoq, saassutaalu napparsimaviliaattariaqarsimalluni. Angut annersarneqangaatsiarsimasoq arfininngornerup ingerlanerani angerlaqqissinnaasimavoq.

Angut 18-inik ukiulik tigusaatillugu angut alla politiit biiliisa matuat ammarlugu aniguisitsiniaraluartoq, politiit aamma tigusaraat. Taama pisoqarmat inuit arlallit akuliupput pagginnerlu aallartillugu.

Ambulancet inuttaat politeeqarfimmut ikiortissarsiormata, politiit freertut aggersarneqartariaqarsimapput.

Tamaangali pisut killeqanngillat, tassami angutit pingajussaat, puiaasaaqqamik politiinut milloorsimasutut tigusarineqarpoq. Paggittullu unitsinniarlugit angutit allat pingasut aamma tigusarineqartariaqarsimapput.

Angut puiaasaaqqamik miloriartoq Nuummi eqqartuussiviup ulluni 19-ini tigummigallagassanngortippaa.

Angutillu 18-inik ukiullip pisunik aallartitsisuusup tigummigallarneqannginnissaanik aalajangiineq, politiit Nunatta Eqqartussivianut ingerlateqqippaat, taassumalu ullumi aalajangerpaa 18-inik ukiulik ulluni 14-ini tigummigallagassanngortinneqassasoq, taama vicepolitikommissær Johan Davidsen Nuummi politiinit ilisimatitsivoq.

Angut 18-inik ukiulimmik aniguisitseriaraluarnini pillugu unnerluutigisassanngortinneqassaaq, tigummigallarneqassanngilarli.

Nuummi sapaatip-akunnerata naanera assut uiverfiusimavoq, politiillu angerlarsimaffinnut ernguffiusunut arlaleriarlutik orniguttariaqarsimapput.