Nuummi politiit ukiup nutaap aallartinnerani ulapipput
Politiit oqarnerat malillugu Nuummi politiit eqqaamasaqanngillat unnuap ataatsip ingerlanerinnaani taamak amerlatigisunik eqqartuussivimmut sassartitsisoqarneranik.
Nuummi inissiarsuit ilaanni angut 16-inik ukiulik sakissamigut savimmik kapineqarpoq, inuunerali ulorianartorsiunngitsoq, Nuummi politiit nalunarput. Angut 25inik ukiulik savimmik kapisinermut atatillugu tigusarineqarpoq, toqutseriarsimasutullu pasineqarluni eqqartuussivimmi killisiorneqassaaq.
Angut alla 26inik ukiulik Nuup illoqarfiup qeqqata missaani nassaarineqarpoq ajoqerserneqarsimalluni ilisimanngitsoq, taanna Nuummi nakorsiartarfiliaanneqarpoq, passunneqarnermilu kingorna angerlartinneqarluni.
Angut 28inik ukiulik tigusarineqarpoq, persuttaasimasutut pasineqarluni eqqartuussivimmi killisiorneqarluni sassartinneqassaaq.
Ullaassaq nalunaaqutaq sisamanut, arnaq 32inik ukiulik Nuummi politeeqarfimmut saaffiginnippoq pinngitsaalisaalluni kinguaassiuutimigut atornerlunneqarsimanini nalunaarutigiartorlugu.
Angut 28inik ukiulik tigusarineqarpoq, pinngitsaaliilluni atoqateqarsimaneranik pasineqarluni eqqartuussivimmi killisiorneqartussanngortinneqarluni.
Ullaassaq nalunaaqutaq tallimat qaangilaaraa arnaq 28inik ukiulik Nuummi politeeqarfimmut saaffiginnippoq, uimi 28-inik ukiullip persuttaasimanera qunusaarisimaneralu nalunaarutigiartorlugit. Arnaq taanna politeeqarfimmut saaffiginninnermini ikilerneqarsimavoq aagasallunilu. Arnaq uiata persuttarsimavaa qunusaarlugulu. Aappariit meeraat pingasunik ukiulik ajoquserneqarsimasinnaaneranik politiit pasitsaassaqarput. Angutip nuliani meerartillu aallaammik qunusaarsimavai. Angut politiinit tigusarineqarpoq, persuttaasimasutut inuunermillu ulorianartorsiortitsisimasutut pasineqarluni eqqartuussivimmi killisiorneqassalluni.
Angut 31inik ukiulik politiinit tigusarineqarpoq angummut allamut persuttaasimanera pillugu.
Angut persuttaasimasoq politiinit tigusarineqarnermini politiimik tilluivoq politeeq qingaatigut aatsilerlugu.
Angut persuttaasoq, peqquserluttuliortartut politiinit ilisimaneqarpoq, taannalu atorfilimmik sulisumik akornusiisimasutut persuttaasimasutullu pasineqarluni Nuummi eqqartuussivimmi killisiorneqassasoq, Nuummi politeeqarfiup nalunaarutigaa.
