Nuummi politiit sapaatip akunnerata naanerani ulapaarsimapput

-Immaqa nalinginnaagaluarpoq, tassa qaammatip aallartisimalernerani pisartut taama ipajaartuaannarput, maani Nuup illoqarfiani, uanili sapaatip akunnerata naanerani, tallimanngormat, ippassaq ullumikkullu pisimasut immikkoorutigigunarpaat, aalakoornerit pissutigalugugit inissiarsuarni eqqissiviilliornerpassuit pisimammata. Init aqqusinerni suni tamani aalakkuttut aamma amerlalluinnarsimapput – silaginnerujussua immaqa peqqutaasimanerpoq. Annersaanernik politeeqarfimmut aamma nalunaarutiginittoqarsimavoq, taakkulu massakkut aamma misissuifigaagut, Frederik Heilmann oqarpoq, nangillunilu:

- Pisiniarfinni tillinniat aamma arlalissusimapput. Taakkulu aamma saniatigut aalakoorlutik biilertut aamma akuunngitsuunngillat, aalakoorlunilu biilernerit pissutaallutik ajutoornerit aamma akuliuffigisimamavut.

Angallatit pingasut sulinitsinni aamma akuusimapput, angallatilik ataaseq motooriminik unittoorsimalluni tallimannormat ullaatungaa politeeqarfimmut nalunaarpoq – tamakkualu nalunaarutigineqraangata soorunami ingerlateqqittarpavut, isumagisarparpullu allanit aaneqarnissaat. Nuup Niaqunngunallu akornanni aamma ikkarlittoqarpoq, angallat marlunnik inuttalik ikkarlimmat, taannalu Aasiaat Radioatigoortumik kalerriutigineqarpoq, Nuummilu politeeqarfimmut anngunneqarluni, qujanartumilli taanna angallat ajoquserani angallammit allamit takkuttumit nusunneqarpoq, akornutissaqanngitsumillu ingerlaqqissimapput. Unnuarlu pisoq Qussummi pisimavoq, kuuata paavatungaani tinikkiartornera taarneralu pissutaasimallutik angallat anngajaaq ammaannatoq ikkarlissimavoq, inuillu inersimasut arfineq-marluusimapput, taavalu meeraq marlunnik ukiulik ataaseq. Taakku kalerrisaarisimapput, Nuummilu politiinut aamma nalunaarsimallutik. Angallatillu allat Qussummiikkallartillugit ikiorneqarsinnaasimapput, taamaalillutillu tuperminni nunami sinissinnaasimapput, Nuummi politeeqarfimmi ittuugallartoq, Ferederik Heilmann naggasiivoq.

Nuummi politeqarfimmi ittuugallartoq, Frederik Heilmann, taama oqaluttuarpoq.

Sinerissap sinnerani, Avannaani, Kujataani Tunumilu politiit aamma ulapaarsimapput, eqqissisimanarsimasorli nalunaarutigaat.