Nuummi Politiit sap. ak. kingulleq ulapissimaqaat

Nuummi politiit sapaatit-akunnerata siuliani ilaatigut pinngitsaaliilluni arnerisoqarneranik ujajaasoqarneranillu suliaqarsimapput.
februaarip 11-at 2014 06:18

Arnaq 49-nik ukioqartoq tallimanngormat politiinut nalunaarutigaa pinngitsaalineqarluni arneriffigineqarsimalluni, tamannalu ernguttoqarnerani pisimasoq, Sermersuumi Politiit tusagassiorfinnut nalunaarumminni taama allapput.

Arnap politiinut nassuiaatigisimavaa angut pinngitsaaliilluni arnerisimasutut pasineqartoq sinilermat aatsaat ikiortissarsiorluni sianersinnaasimalluni.

Politiit nalunaarutigaat pasineqartoq assingusumik pinerluuteqarsimasutut politiinit ilisimaneqareersoq. Pasineqartorli pinngitsuunerarsimavoq.

Paasiniaasoqarneranut atatillugu ulluni 26-ni tigummigallagassanngortinneqarpoq.

Ujajaaneq

Angut 65-inik ukioqartoq niuertarfiup Eurosparip iluani tallimanngormat ujajaaffigineqarpoq. Aningaasanik tigusisarfimmi 1000 koruuninik tiguseqqammerluni ujajaaffigineqarpoq.

Pasineqartoq kingorna videomik nakkutilliissutikkut immiussatigut ilisarineqarpoq.

Tigummigallagassanngortinneqarnissaa siunertaralugu ippassaq inatsit tunngaviusoq naapertorlugu killisiorneqartoq, politiit paasissutissiissutigaat.