Sapaatip akunnerata naanerani Nuummi saassussinerit marluk pillugit politiit ilisimannittunik oqaloqateqarusupput.
Arfininngornerup sapaatillu unnuaani nalunaaqutaq 4.10-p aamma 4.16-ip akornanni angut inuusuttunit sisamanit imaluunniit tallimanit Pikkori Sportip eqqaani saassunneqarpoq. Angut tilluarneqarpoq isimmittarneqarlunilu. Tamatuma saniatigut mobilia, aningaasaatai matuersaataalu tillinneqarput.
Unnuaq taanna – nalunaaqutaq 4.00-ip aamma 4.30-ip akornanni Jagtvejip aamma Sipisaq Kujalliup naappiffianni aamma angut saassunneqarpoq. Aamma taassuma mobilia, aningaasaatai matuersaataalu tillinneqarput. Inuit sisamat saassussinermi peqataapput.
Saassussinernut taakkununnga marlunnut ilisimannittunik politiit attaveqarusupput. Tassa inunnik sapaammi ullaassakkut nalunaaqutaq sisamat kingorna sumiiffiit taaneqartut eqqaanniissimasunik.
Saassussinernut atatillugu inunnik arlalinnik tigusarinnittoqareerpoq, eqqartuussivimmillu tigummigallagassanngortinneqareerput – taamaattorli politiit ilisimannittunik allanik attaveqarusupput.
Nuummi politiit oqarasuaammut 32 14 48-mut attavigineqarsinnaapput.
