Nuummi politiit biilinik malersuisut: Biilertoq unikkusunngitsoq
Nuummi politiit unnuaq biilinik aallarussisoq aportariaqarsimavaat.
Kalaallit Nunaanni politiit pigaartuat, Nûno Larsen, taama oqarpoq.
- Biilit tillinneqarsimapput, taakkulu politiinit malersorneqaramik unikkusunngillat, kinguneraa politiit unitsitsiniaassariaqarsimanerat, videomi takuneqarsinnaavoq tamanna iluatsittoq, taanna oqarpoq.
Video: Christa Noahsen Eugenius
Biilit sukkalisaarlutik qimaasut, politiinit unitsinniarsarineqarlutik aporneqartut videomi takuneqarsinnaavoq, taanna inuit attaveqaqatigiittarfiisigut Facebookikkut ingerlaartoq, Nûno Larsenip eqqartorpaa.
Biilit sukkavallaamik ingerlanerat pissutaalluni politiinit unitsianniarneqarsimasoq, Nûno Larsen oqarpoq.
- Biilit sivisuumik unitsinniarsarineqarsimapput, angallattunullu allanut navianartorsiortitsinissaat pinngitsoortinniarlugu unitsinniarneqartariaqarsimapput, Nûno Larsenip oqaatigaa.
AAMMA ATUARUK Biilit tillitat ajutoortut: Pasisat marluk qimaasut
Qanoq sukkalisaartigisoqarsimanersoq paasissutigisinnaanngilaa, taamaattorli sukkasaartoqarsimasoq oqaatigisinnaallugu.
Politiinit biilit unitsinneqarmata tigusarinnittoqartoq Nûno Larsen ilisimatitsivoq. Suliarli suli misissorneqarmat inuit qassit tigusarineqarnersut imaluunniit imigassanik aalakoornartutalinnik aangajaarniutinilluunniit atuisoqarsimanersoq oqaatigineqarsinnaanngikkallartoq, taassuma ilanngullugu oqaatigaa.
Illoqarfiup pingaarnersaani ippassaq aamma pisoqangaatsiarpoq, tassanimi biilit tillinneqarsimasut ajoqusermata.
Tassani suliami aallarussisut qimaasimammata tigusarinnittoqarsimanngilaq, inuilli pasineqartut marluk pisoqarfimmiit qimaasimasut takuneqarsimapput.
Tassunga unnuaq pisumut inuit pineqartut pisooqqataasimanersut politiinit nalileruminaappoq.