Nuummi politiit garage-aat ulikkaaraluttuinnarpoq, inissakilliornermullu knallertit pissutaapput.
Knallertit sorliit nunatsinni atorneqaqqusaanersut sorliillu atorneqaqqusaannginnersut nalornisigineqarmat knallerterpassuit politiinit arsaarinnissutigineqarsimapput.
Vicepolitikommmissæri Johan Davidsen ima oqarpoq:
- Knallertit sisamillu assakaasullit suliffeqarfinniit pingasunit sisamanilluuniit inuinnarninngaanniillu tiguniakuuagut, unioqqutitsinertalimmik eqqussisoqarsimanersoq misissorumallugu, John Davidsen oqarpoq, nanglillunilu:
- Nunatsinnut eqqussisoqassaguni taakkuussapput marlunnik pingasunilluunniit assakaasullit, motorialu 50 kubikcentimeterit sinnerlugit angissuseqassanngitsoq, aqqusinikkullu manissukkut akunnermut 30 kilometerit ingerlasinnaassanngitsut, Johan Davidsen naqissusiivoq.
Knallertit qulit 15-illu akornanniittut arsaarinnissutigineqarsimapput, ajornartorsiullu tassaavoq sorliit nunatsinni atorneqaqqusaanersut atorneqaqqusaannginnersulluunniit nalornisigineqarmat.
Knallertit pillugit suliat Danmarkimi Færdselsstyrelsi suleqatigalugu ingerlanneqartarput, knallertillu pillugit suliat sapaatit akunneri marluk ingerlanerini aalajangiiffigineqarsinnaanissaat neriuutigineqarpoq:
- Knallertit sorliit eqqunneqarsinnaanersut eqqunneqarsinnaannginnersulluunniit, kiisalu qanoq angissuseqarsinnaanersut Færdselstyrelsip naliliiffiigisarpaa. Færdselstyrelsi qanoq oqaaseqassanersoq utaqqivarput, naggataatigullu aalajangiisuusussaq tassaavoq nunatta politimesteria Steen Thomsen, Johan Davidsen naggasiivoq.