Nuummi persuttaasimasoq ujaarineqarpoq

Angut 57-inik ukiulik angummit allamit Oles Varehusip eqqaatigoortilluni ippassaq ataasinngornermi unnukkut qulinut tanneq qulingiluanngortoq saassutarineqarpoq.

Angut 57-inik ukiulik Dronning Ingridip napparsimmavissuanut unitsinneqartariaqarsimavoq, persuttarneqarnermi kingunerisaanik ullumi pilatsissalluni.

Angut marloriarluni saassutarineqarpoq. Angut saassunneqartoq bussinut ilaalluni illoqarfiup qeqqanut qulingiluanut qiteqquteriitsiartoq apuuppoq Radiup Qaqqaanut angerlassalluni. Aqqusinersuulli Samuel Kleinschmidtillu aqqutaata nalaani tassanngaannaq kiinnamigut tillunneqarpoq uppimmallu saassussisup arlaleriarlugu isimmitsarpaa.

Angut angerlamut ingerlaqqinnialeruttortoq Oles Varehusi tikikkaalu angutip angoqqippaa kingumut persuttaqqilerlugu.

Angut saassussisoq kalaaliuvoq 30-t 35-llu akornanni ukioqassangatinneqartoq, 170 centimeteritut angissusilik, tungujortumik kavaajaqarlunilu koorbunik qarleqartoq.

Angut saassunneqartoq Café Pregomut ikiortissarsiormat tassanngaanniit politiit napparsimmavillu kalerrinneqarsimapput.

Nuup qeqqani ippassaq unnukkut saassussinermik takunnissimasinnaasut angutilluunniit saassussisuusimasup kinaaneranik paasissutissiisinnaasut Nuummi politiinut nalunaaqquneqarput. Pigaartumut oqarasuaat sianerfigisassaq tassaavoq 32 14 48, 32 14 48.