Nuummi parnaarussivissaq isumannaatsuussaaq

Ukioq 2015 nallerutsigu Nuummi pinerlussimasunut parnaarussivik naammassineqarsimassaaq. Danskit Inatsiseqarnermut ministeriat, Lars Barfoed ulluni makkunani nunatsinniippoq Naalakkesuisut siulittaasuat Kuupik Kleist ataatsimeeqatigissallugu.
aggustip 14-at 2010 16:49

Taakku isumaqatigiipput parnaarussivissami isumannaallisaaneq pitsaanerpaajussasoq.

Pineqaatissinneqarsimasut tarnimikkut napparsimasut arfinillit qanittukkut Århusimi inissinneqarfigisaminniit qimaareernerisa kingorna, parnaarussanut inissiisarfissap Nuummiittussap, sillimaniarnikkut pitsaasuulluinnarnissaa pingaartinneqarpoq. Inatsiseqarnermut ministeri Lars Barfoed ima oqarpoq:

- Parnaarussassat inoqatiminnut ulorianartorsiortitsippata, Nuummilu inuttaasut toqqissillutik inuussappata, pisariaqarpoq sillimaniarneq pitsaalluinnartoq qulakkiissallutigu. Lars Barfoed oqarpoq.

Parnaarussivik pinerlussimasunut 76-nut isissaqartoq nutaarluinnaq, ukiut sisamat qaangiuppata naammassineqartussaavoq. Pilersaarutit malillugit parnaarussivik matoqqasortaqarlunilu ammasortaqassaaq. Maanna Herstedvesterimi parnaarussat kalaallit aammalu piffissamik aalajangerismanngitsumik pineqaatissinneqarsimasut, Nuummut nuunneqarnissaat naatsorsuutaavoq. Naalakkersuisut siulittaasuata Kuupik Kleistip sillimaniarneq pitsaasoq aamma pingaatippaa:

- Pineqaatissinneqarsimasut tarnimikkullu napparsimasut inissiisarfianniit Århusimiittumit, maanni parnaarussivissaq isumannaannerussasoq, inatsiseqarnermut ministerimut oqaatigaara, Kuupik Kleist oqarpoq.

Parnaarussat sivisuumik pineqaatissinneqarnermi kingorna inuiaqatigiinnut ilanngutitaaqqinnissat parnaarussiviup siunertarissagaa, Lars Barfoedip aamma Kuupik Kleistip isumaqatigiissutigaat.

- Parnaarusssivik maani Kalaallit Nunaanniippat, parnaarussat ilaquttaminnut kammalaatiminnullu attavissarissaarnerussapput, taamaattarnerlu sivisuumik parnaarussaasunut pingaaruteqarpoq, tassami parnaarusaareernermi inuiaqatigiinnut uternissaq siunertaasarmat. Taamaattumik maani parnaarussiviup siunertarissavaa tamanna, Lars Barfoed naliliivoq.

Pineqaatissiinermi Kalaallit Nunaata siunertarivaa pineqaatissinneqarsimasut inuiaqatigiinni inooqataaleqqinnissaat, pinerlussimasunik inissiisarfik toqqorsiviuinnarani, Kuupik Kleist erseqqissaavoq:

- Taamatut iliuuseqarnerput eqqumaffiginerulerneqaqqissasoq pingaartuuvoq. Maannakkut pinerlussimasunut isertitsivinni aammalu siunissami parnaarussivissami, Kuupik Kleist oqarpoq.