Unnugu arfernup tungaanut ulussaarsuartut sakkortutigisinnaasartumik anoraasuassaaq.Assi: Jeanne Holm

Nuummi Paamiunilu ualimut ulussaarsuartut sakkortutigisumik anorersuassaaq

Nunatta kitaata ilaani ualimut sekundimut 33 meterisut anoraasuartassaaq.

Nuummiikkuit Paamiuniikkuillu ualimullu anissaguit qullersuup napasuanut ataniartariaqarataannaavutit.

DMI-mmi illoqarfinni taakkuni marlunni ulussaarsuartut sakkortutigisumik anoraasuartarnissaa aarlerisaarutigaa.

Tassa anoraasuat ualimut sakkortunerpaagunik sekundimut 32-nit – 33-nut sakkortussuseqartarsinnaapput, Nuummi DMI-mi silasiortoq, Tove Fast oqarpoq.

- Mittarfimmi anoraasuaq sekundimut 25-nik sakkortussuseqartoq maanna uuttorneqareerpoq, silasiortoq KNR-imut ullup qeqqata kingorna oqarpoq.

- Anorersuaq ualimut sakkortusissaaq. Anoraalu ualip ingernerani natsimaneruleriartussaaq, unnuguli arfernup tungaanut anoraasuaq ulussaarsuartut sakkortutigisinnaasassaaq.

Nuummi 12-inik kiattoq

Naqitsiniisaffissuaq Nuup Paamiullu akornanni maanna ingerlaarpoq, illoqarfiillu pingaarnersaata mittarfiani 12-inik kiattoq uuttorneqarpoq. Unnuguli nillernerungaatsialeriartussaaq.

Aqagu qatsungaqqilissaaq, spaatiuppalli anorlileqqissalluni.

- Sapaatiuppalli anoraasuaq ulussaarsuartut sakkortutigissanganngilaq, Tove Fast oqarpoq.

Pequttat tingissinnaasut tamarmik eqqunneqarnissaat taassuma kaammattuutigaa. Pississaartarfiit trampolinet aamma ilanngullugt. Kalaallit Nunaanni Politiit aamma taama kaammattuuteqarput.

- Pigisat teqqajasut inunnut pigisanullu navianaateqarsinnaasarmata, piffinni sanaartorfiusuni eqqaannilu isumannaallisaasoqarnissaanik politiit suliffeqarfiit qinnuigaat. Aammattaaq Nuummi Paamiunilu innuttaasut qinnuigineqarput pigisaminnik isumannaarsueqqullugit, angallataatillillu angallatiminnik pituttuilluarnissaannik qinnuigineqarput, politiit Facebookikkut allapput.

 

 

Nunatsinni timmisartuutileqatigiiffiup oqallisaangaatsiartup timmisartut aamma uninngatiinnartariaqarpai.

- Pingaartumik Nuuk, Paamiut aamma Maniitsoq anorersuarmik eqqugaassapput, nunamili sumiiffinni amerlasuuni silap unerisimannginnissaanik ilimasaaruteqarluni, Air Greenland Facebookikkut allappoq.

- Angalasussat tamaasa piaartumik angalanissanut nutaanut inississorlugit suligasualeruttorpugut, taamaattumik angalasussat qinnuigissavagut emailitik sms-illu nakkutigeqqullugit.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl